02.03.1945
Efri deild: 140. fundur, 63. löggjafarþing.
Sjá dálk 352 í C-deild Alþingistíðinda. (3192)

140. mál, tekjuskattur og eignarskattur

Guðmundur Í. Guðmundsson:

Herra forseti: — Ég hef athugað lítillega þessa brtt., sem hv. þm. Seyðf. ber hér fram á þskj. 1265, og eftir þeirri þekkingu, sem ég hef á þessum málum, fæ ég ekki betur séð en að hér sé um að ræða að taka upp í skattal. ákvæði, sem mér í raun og veru virðist, að alltaf hefði átt að vera í l. Í brtt. er ekki farið fram á annað en það, að skattanefndir passi upp á það, þegar þær ákveða skatt skattþegnanna, að skattleggja allar þeirra tekjur, sem fram koma á skattaframtölum, og að ríkið skuli ekki missa af skattgjöldum, ef skattanefndir passa ekki upp á það þegar í stað að leggja skattinn réttilega á. Þetta er regla, sem alltaf hefði átt að vera í skattal., bæði til aðhalds fyrir skattanefndirnar til þess að passa upp á, að þær leggi skattinn réttilega á, og til þess að skapa skattborgurunum það öryggi, sem þeir eiga heimting á.

Ég get líka fallizt á það með hv. þm. Seyðf., að síðara ákvæðið í brtt. eigi fullan rétt á sér, því að að sjálfsögðu er það ekki nema skylda að fylgja sömu reglum um framkvæmd skattal. og álagningu tekjuskatts frá ári til árs, en ekki sé verið að hringla með þær reglur fram og aftur þannig, að skattborgararnir geti ekki vitað fyrir fram, hvernig skatturinn er reiknaður. Það hefur komið fyrir, að skattanefndir hafa viljað hringla með þetta fram og aftur, og með því hefur skapazt öryggisleysi meira en góðu hófi gegnir. Dæmi munu vera um það, að svo langt hafi gengið, að þetta hringl fram og aftur hafi haft mjög alvarleg áhrif á afkomu atvinnurekenda. Ég fyrir mitt leyti hef alltaf fylgt þeim sjónarmiðum, sem fram koma í þessari brtt. frá hv. þm. Seyðf.

En það er eitt atriði, sem hv. 3. landsk. minntist á og mig langar til að biðja hv. þm. Seyðf. um frekari skýringar á, sem er, að í síðari málsl. brtt. hv. þm. segir, að skattanefndum beri að fylgja sömu reglum frá ári til árs um framkvæmd l. um álagningu tekjuskatts og ákvörðun skattanefnda um þessi atriði verði ekki breytt nema með hæfilegum fyrirvara. Það kemur ekki beinlínis fram berum orðum í brtt., hvað meint er hér með orðunum hæfilegum fyrirvara. En eins og brtt. er byggð og orðuð, get ég ekki skilið þetta ákvæði um hæfilegan fyrirvara á annan veg en þann, að þær nýju reglur, sem skattanefndir hyggjast að taka upp, skuli eingöngu koma til framkvæmda við álagningu skatts á þær tekjur, sem skattborgari aflar sér eftir að tilkynning um þær reglur hefur verið birt. Ég vil spyrja hv. þm. Seyðf., hvort þetta sé ekki meint með orðunum hæfilegum fyrirvara. Og ef það er rétt skilið, mun ég greiða atkv. með þessari brtt.