21.05.1947
Neðri deild: 135. fundur, 66. löggjafarþing.
Sjá dálk 683 í B-deild Alþingistíðinda. (684)

215. mál, flugvellir

Jónas Jónsson:

Hæstv. ráðh. hefur nú skýrt frá, að í viðbót við þessar 7 millj. er bætt við veður- og símaþjónustu. Nú segir hæstv. ráðh., að reynt sé að fá eitthvað af þessu endurgreitt. Það munu vera 3 ár síðan flugmálaráðstefna var í Montreal, ef ég man rétt, og þar fékkst engin trygging, enda ósennilegt að nokkuð fáist greitt frá alþjóðasamtökum, þar sem Bandaríkin taka að sér rekstur Keflavíkurvallarins. Það er því allt á huldu með það, hvort nokkuð muni fást til að minnka útgjöld landssímans. En hvernig stendur á því, að sama starfsliðið er látið vera áfram á vellinum, eftir að séð hefur verið, hvernig það starfar? Hvað á eftirlit að þýða á óhæfa menn? Ég vil enn minna á ólagið á Keflavikurvellinum, það hefur verið margháttað og óþægilegt. Það er vitað, að sá, sem hafði flugmálin í síðustu stjórn, var á móti því, að Bandaríkin starfræktu flugvöllinn, og þessi ráðh. kom þangað ýmsum, sem lítið gagn var að, m.a. sendi hann þangað mann, sem enga kunnáttu hafði á því, sem hann átti að gera, og sambandið milli þessara Íslendinga og Ameríkumannanna hefur verið eins leiðinlegt og lélegt og hægt var. En lögreglumaður, sem bæjarfógetinn í Hafnarfirði sendi, hefur staðið fyrir rétti landsins og unnið því álit, en öðru máli var að gegna um þá menn, sem flugmálastjórinn sendi þangað, þeir hafa ekki verið til annars, en að þvælast fyrir. Flaggið er gott dæmi þess. Það átti að vera merki yfirráða Íslendinga yfir vellinum, eina táknið, sem þeir höfðu þar, en það var ekki einu sinni sett á stöng. Svona var allt svo ómyndarlegt, að betra hefði ekkert verið. Og þetta var vegna þess, að flugmálastjórinn vildi hafa þetta í ólagi, þess vegna var ekkert gert til að bæta úr þessu. En bæjarfógetinn í Hafnarfirði hafði þarna menn, sem voru til mikils álitsauka fyrir þjóðina, t.d. menn, sem hjálpuðu við að fara úr og í flugvélar, sem alls staðar er gert meðal siðaðra þjóða. Ég vil svo lýsa ánægju minni yfir því, að hæstv. ráðh. sér og hefur skilning á, að ekki er allt í lagi með fjárhaginn.

Það hefur þegar komið í ljós, að Reykjavíkurflugvöllurinn er of lítill, en þá vildu kommarnir stækka hann og hikuðu ekki við að leggja til, að rifin væru nokkur hús borgaranna hér í bænum í því skyni. Það plan þeirra hefði komið til með að kosta 30 til 40 milljónir kr. Völlurinn er allt of stór og okkur algerlega ofvaxinn. Hann er því svipaður í höndum okkar og stórskipið Nelson, ef Bretar hefðu gefið okkur það. Við fengum þarna sverð, sem við ekki ráðum við, þess vegna grotnar hann niður, án þess að við fáum að gert. Okkur nægir flugvöllur eins og Melgerðisflugvöllurinn.

Hann réðum við við, og hann væri í samræmi við. okkar fjárhag.

Nú ætlar flugmrh. að bæta nefnd við í sambandi við reksturinn og ráða sjálfur menn til langs tíma, en láta þá fara, sem starfað hafa undanfarið, þó að það virðist vera miður heppileg ráðstöfun.

Mér þykir rétt að láta þetta koma fram, svo að menn geti séð, hvernig ástandið er og hvert stefnir, því að ef þetta frv. verður samþ., þá er fjárhag þjóðarinnar stefnt í voða. En það eru litlar líkur til, að bót verði ráðin á þessu, ef núverandi stjórn treystist ekki til að gera betur en fyrrverandi stjórn.