11.05.1949
Neðri deild: 106. fundur, 68. löggjafarþing.
Sjá dálk 1780 í B-deild Alþingistíðinda. (2762)

208. mál, áhrif kjötverðs á framfærsluvísitölu

Sigurður Guðnason:

Það er sjálfsagt um þetta mál eins og mörg önnur, að um það þýðir ekkert að ræða. Ég get þó ekki látið hjá líða að lýsa því yfir, að ég er þessu frv. algerlega andstæður og álit það að ýmsu leyti koma mjög óréttlátlega niður. Má þar taka sem dæmi, að einungis þeir einhleypingar, sem hafa innan við 7 þús. kr. árstekjur, fá kjötuppbætur. Það er með öðrum orðum hér um bil farið niður í menn, sem lifa á ellilaunum. Ég gæti trúað því, að t.d. maður, sem ætti 4 börn og hefði þar af leiðandi rétt til uppbóta fyrir eitt barníð, mundi brosa að því að fá rúmar 1.200 kr. í uppbætur, þegar stúlkan í bakaríinu, sem mælir honum mjólk og hefur kannske ekki nema svona 7.800 kr. laun, missir af sínum 200 kr. Ég er alveg viss um, að t.d. maður; sem á 4 börn og hefur 30 þús. kr. í árstekjur, lifir betur en einhleypar stúlkur. Það má kannske segja, að það muni ekki mikið um 214 kr., en það munar um það, þegar borga á skatta í ofanálag. Þetta fólk borgar enga skatta nema í tryggingarnar og á nú ekki hægt með að draga þessa upphæð saman. Og það er stór hópur af þessu fólki, sem hefur haldið tryggingunum við einmitt með þessum styrk. Mikill hluti þessa fólks, sem kjötuppbæturnar eru teknar af, verður því verst úti. Þeir, sem eftir standa, eru menn, sem hafa dálítið stór heimili og háar tekjur. Ég mundi þess vegna telja eðlilegast, að kjötuppbæturnar væru teknar af öllum, úr því að verið er að þessu á annað borð.

Ég skil nú ekkert í þessu. Það er sagt, að þetta sé gert vegna þess, að vísitalan megi ekki hækka. Nú er það vitað, að allir þessir skattar koma ekki af hækkuðu kaupi, heldur koma þeir þrátt fyrir það, að kaup hefur ekki hækkað. Þetta getur þess vegna eingöngu orðið til þess að auka dýrtíðina, rýra kjör almennings og gera afkomu bæði þjóðarinnar og einstaklinganna verri.