10.11.1948
Sameinað þing: 15. fundur, 68. löggjafarþing.
Sjá dálk 722 í D-deild Alþingistíðinda. (5015)

902. mál, sjúkrahælin í Kumbaravogi og Kaldaðarnesi

Fyrirspyrjandi (Jónas Jónsson):

Hæstv. ráðh. hefur nú gert nokkra grein fyrir þessu máli, og er hún til bóta, þó að þing og þjóð kunni e. t. v. að fýsa að vita eitthvað meira um það en enn er komið fram. Til dæmis er eitt höfuðatriði og þar sem hér er staddur einn af höfuðmönnum góðtemplara, sem verið hefur í stjórn hælisins, þá vildi ég beina til hans fyrirspurn um það höfuðatriði, hvers vegna lagt var út í þetta, án þess að vistmenn hælisins væru sviptir sjálfræði. — Þá er það eftirtektarvert, að eytt hefur verið til Kaldaðarneshælisins 800 þús. kr., og þá fyrst kemur í ljós, að það er ónothæft. Ég verð að segja, að það er vel lagið til að koma þeirri trú á, að viðkomandi yfirvöld hafi ekki alls kostar góða gát á því, hvað verið er að ráðast í með slíkum framkvæmdum. Og varðandi skýringar hæstv. menntmrh. verð ég að segja, að þær eru engan veginn fullnægjandi. Hann taldi í fyrsta lagi, að hælið þyrfti að vera undir læknishendi. Á móti því mælir það, að læknar standa algerlega ráðþrota gegn áfengiseitrun, og það eru tómar hrossalækningar, sem reyndar eru. Þá nefndi hæstv. ráðh. það í öðru lagi, að ástand jarðarinnar væri mjög bágborið af völdum setuliðsins. Þar er því til að svara, að Bretar borguðu fyrir skemmdir á jörðinni um 300 þús. kr., og hefði mátt rífa talsvert af tóftunum fyrir það fé. Og þó að það sé allt í einu gefið upp, eftir að búið er að flytja hælið í Kaldaðarnes, að staðurinn sé óheppilegur vegna niðurníðslu jarðarinnar, þá er jörðin þó ekki verri en svo, að hún lokkar mann, sem setið hefur á ágætisjörð og er hinn duglegasti bóndi.

Ég sé ekki ástæðu til að fjölyrða mikið um þetta, en mér virðist svo sem haldið hafi verið á þessu máli af fullkomnum barnaskap og ræfildómi frá byrjun. Og það vegur ekki þungt til skýringar, þótt því sé haldið fram, að atvmrn. hafi heimtað jörðina til að losa Skálholt.