05.11.1952
Sameinað þing: 10. fundur, 72. löggjafarþing.
Sjá dálk 219 í D-deild Alþingistíðinda. (2627)

56. mál, endurskoða orlofslögin

Sigurður Guðnason:

Herra forseti. Það var nú ekki mikið, sem ég hafði að athuga við þessa ræðu, en ég ætlaði bara að upplýsa það, að hv. 8. landsk. sagði, að upphafið að þessu hefði verið n., sem Alþfl. skipaði, og að málið hefði ekki fengið skrið fyrr en þessi n. var skipuð. Þetta er algerlega rangt, því að n. er skipuð í nóv. 1941, en Dagsbrún er búín að gera samninga við Reykjavíkurbæ í marz 1941 og við atvinnurekendur á sama tíma í nóvember um haustíð, þegar n. er skipuð, og þá var það, sem kom skriður á málið. Og það, sem samið var um í Dagsbrúnarsamningunum, var nákvæmlega sama fyrirkomulagið og það, sem n. samdi, nema að því leyti, að hún samdi um einn dag fyrir mánuð, en í samningunum, sem Dagsbrún var búin að gera og var búin að fá borgað eftir, var það einn dagur fyrir tvo mánuði, eða 6 dagar. Og undirstaðan að þessu með orlofslögin var búin að vera til undanfarandi ár og mjög oft til umræðu. Allir menn, sem voru í föstum stöðum, voru búnir að fá orlof, og í raun og sannleika var það orðið sameiginlegt mál bæði verkalýðsins og atvinnurekenda, að menn, sem unnu á tímakaupi, ættu það líka skilið; það var formið, sem fundið var að. En það var bara eitt, sem fékkst þarna, og það var að hækka greiðslurnar, og þegar búið var að semja orlofslögin, þá var fyrst samið um, að það skyldi verða svona. Fyrst var Dagsbrún, sem samdi um það, að hún skyldi fá þetta, hvort sem það yrði að lögum eða ekki, og stærri félögin, og þá var engin ástæða til annars, og öllum fannst sjálfsagt gagnvart þeim, sem væru aflminni, að það væri lögfest. Það getur verið, að það sé af því, að ég hef minni trú fyrir verkalýðinn á hv. Alþ., að það fari með hans mál, og mér finnst það ekki hafa verið svo hér, að hann hafi átt yfirleitt vinsældum að fagna um ýmis sín mál, að ég held, að undirstaðan til þess a. m. k., að það verði nokkur árangur, sé baráttan í verkalýðsfélögunum sjálfum. Og flestum málum, sem hafa fengizt fram hér á Alþ. til hagsbóta fyrir verkalýðinn, hefur verið unnið að hjá verkalýðnum sjálfum, en það hefur verið komið hingað til Alþ. og ekki verið bætt úr því fyrr en ekki var annað hægt en að gera það vegna almenningsálitsins.