15.04.1955
Neðri deild: 72. fundur, 74. löggjafarþing.
Sjá dálk 610 í B-deild Alþingistíðinda. (770)

188. mál, tekjuskattur og eignarskattur

Fjmrh. (Eysteinn Jónsson):

Það voru aðeins fáein orð. — Ég ætla ekki að ræða neitt um það, sem hv. 2. þm. Reykv. (EOl) sagði. Hann var að minnast á, að það væri undarlegt, hvað mönnum gengi illa að koma sér saman um smáatriði eins og það, hvernig ætti að leggja skatta á landsmenn. Ég held, að hv. þm. hljóti að hafa sagt þetta í gamni, því að hingað til hefur nú hljóðið verið annað en að það væri smáatriði að leggja á landsmenn 500 millj. kr. árlega og hvernig því væri hagað.

Ég kvaddi mér hljóðs út af því, sem hv. síðasti ræðumaður sagði. Ég tók þannig til orða, að það mundi muna ríkissjóð sáralitlu til eða frá, hvort þetta frv. væri samþ. eða ekki, og það er alveg rétt. Það byggist að höfuðefni til á því, að þó að hér sé gert ráð fyrir 20% lækkun á skatti félaga, eins og samþ. var í fyrra, þá er hér einnig um að ræða framlengingu á tekjuskattsviðauka á tekjur félaga í þessu frv. og um framlengingu á álagi á eignarskatt. Ráðuneytisins menn segja mér, að þetta jafni sig nokkuð upp, en um þetta get ég að sjálfsögðu gefið n. nánari upplýsingar. — Það er rétt, sem hv. 1. landsk. þm. sagði, að tekjuskattur félaga er ekki nema — ja, ég veit ekki, hvort maður má segja tiltölulega lítill hluti af tekjuskattinum, og stafar það af ástæðum, sem of langt yrði hér að rekja.

Ræðumenn stjórnarandstöðunnar hafa sagt, að stjórnin hafi lofað því að setja ný l. um skatt félaga á þessu þingi. Þetta er ekki rétt og stafar sjálfsagt af misskilningi. Stjórnin lofaði því að láta vinna að því að undirbúa frv. um skatt félaga og leggja fyrir þetta þing, en það hefur ekki tekizt að komast að niðurstöðu um það mál, og þar af leiðandi er það ekki hægt. Það eru ekki svik á neinu loforði. Auðvitað var ekki hægt að gefa neitt loforð um slíkt. Það hlaut að velta á því, hvort það tækist að ná niðurstöðu um málið. Hverjar ástæður séu til þess, að ekki hefur náðst niðurstaða, um það verða menn að geta sér til. Um það verður engin skýrsla gefin, þótt hv. 2. þm. Reykv. eða aðrir færu fram á slíkt.

Hv. 8. landsk. þm. (BergS) sagði, að það væri ljóður á þessari ríkisstj., að hún lækkaði aðeins skattana á þeim ríku, en ekki á þeim efnaminni. Ég vil leiðrétta þetta. Skattar á einstaklingum voru lækkaðir um það bil 28% eða 29% að meðaltali s.l. ár, en einungis um 20% á félögum.

Skattar á alþýðu manna, tekjuskattar, eru nú orðnir þannig, að ég mun fara með rétt mál með því að segja, að einhleypur maður, sem hefur 35 þús. kr. tekjur, sem eru geðugar tekjur fyrir einhleypan mann, að minnsta kosti mundi okkur finnast það, barnakörlunum, muni borga í kringum 1300 kr. á ári til ríkisins af þeim. Fjölskyldumaður greiðir þá náttúrlega ekki neitt af slíkum tekjum. Hér hefur orðið á mikil breyting. Þetta er því misskilningur hjá hv. þm.