02.06.1960
Neðri deild: 95. fundur, 80. löggjafarþing.
Sjá dálk 3026 í B-deild Alþingistíðinda. (1186)

175. mál, Háskóli Íslands

Jóhann Hafstein:

Herra forseti. Þetta mál hefur sætt verulegri gagnrýni hér í d., bæði þegar það var fyrst flutt, að því leyti að þinginu gæfist litíð tóm til að athuga málið, og einkum og sér í lagi eftir að málið kom breytt frá Ed, og breytt í þeirri mynd, að með þeirri breyt. var ákveðið að stofna nýtt embætti í viðskiptafræðum við viðskiptadeildina, sem þá yrði sérstök deild, en er nú laga- og viðskiptadeild í háskólanum. Bæði hv. 3. þm. Reykv. (EOI) og hv. 7. þm. Reykv. (ÞÞ) hafa gert þessa málsmeðferð sérstaklega að umtalsefni, að með henni sé þinginu engan veginn gefið nægjanlegt tóm til þess að hafa í höndum sér eða fjalla um jafnþýðingarmikið mál og það er að stofna nýtt embætti, prófessorsembætti við háskólann, sem mundi leiða af sér stofnun nýrrar deildar. Hins vegar var það svo, að þó að nokkuð væri deilt á það, þegar málið kom hér fyrir í öndverðu, að það væri seint fram komið, þá varð þó samkomulag um afgreiðslu málsins og málinu hleypt áfram til Ed. og olli þá ekki neinum ágreiningi, a.m.k. ekki sem fram kæmi, að teljandi væri. Nú ber að viðurkenna þessi sjónarmið og hæstv. menntmrh. gerði það einnig í ræðu sinni áðan, og þetta var, eins og ég sagði, að vissu leyti meginuppistaðan í þeirri gagnrýni, sem fram kom hjá þeim tveimur hv. þm., sem töluðu, þeim hv. 3. þm. Reykv. og hv. 7. þm. Reykv. Ég fellst einnig á þessi sjónarmið, sem fram hafa komið hjá báðum þessum hv. þm. og einnig eru viðurkennd af hæstv. menntmrh., og vildi mega freista þess með flutningi brtt. að koma nokkuð til móts við þau sjónarmið í trausti þess, að það gæti skapað frið um afgreiðslu þessa máls nú, alveg á elleftu stundu fyrir þinglausnir.

Hv. 3. þm. Reykv. hefur flutt brtt., sem er þess efnis, að málið er fært í hið sama form og það var afgr. héðan frá d. Við þessa brtt. mundi ég vilja flytja brtt. þess eðlis að efni til, að það verði tekið fram í 1. gr. frv., sem eins og það fór héðan fjallaði aðeins um 2. og 5. tölulið í 37, gr., að það verði óbreytt, en skotíð inn ákvæði um 3. tölulið í 37. gr., þ.e.a.s. að þar komi til viðbótar, að í laga- og viðskiptadeild skuli vera 7 embætti, en með þeirri viðbót: „en þó skulu prófessorsembætti í viðskiptafræðum ekki verða 3, fyrr en fé er veitt til þess á fjárlögum.“ Þá fer málið efnislega eins út úr þessari d. og það var áður afgreitt, en með þeirri einu breyt., að þriðja prófessorsembættið í viðskiptafræðum geti þó orðið stofnað, þegar fé er veitt til þess á fjárl. Kemur það sjónarmið til móts við þær breyt., sem gerðar voru í Ed., en viðurkennir hins vegar þau meginrök, sem hér hafa komið fram, að málið er enn þá, stofnun viðskiptadeildarinnar og stofnun þriðja prófessorsembættisins í viðskiptafræðum, í höndum þingsins, og gefst nægur tími til þess að taka það til meðferðar, hvort og hvenær hv. Alþ. vill veita fé til þess, að þetta þriðja prófessorsembætti skuli stofnað verða og þar með viðskiptadeildin verða að sérstakri deild.

Þetta er efni þeirrar brtt., sem ég vildi nú, með leyfi forseta, leyfa mér að flytja hér skriflega. Það er brtt. við brtt. á þskj. 626, þ.e. brtt. hv. 3. þm. Reykv. við frv. til l. um breyt. á l. nr. 60 1957, um Háskóla Íslands, og brtt. er þessi:

„1. töluliður orðist svo:

Við 1. gr. Greinin orðist svo:

2., 3. og 5. tölul. 37. gr. orðist þannig:

2. Í læknadeild 10.

3. Í laga- og viðskiptadeild 7 — en þó skulu prófessorsembætti í viðskiptafræðum ekki verða þrjú, fyrr en fé er veitt til þess á fjárlögum.

5. Í verkfræðideild 5.

Leyfi ég mér svo að afhenda hæstv. forseta þessa brtt. með tilmælum um, að óskað sé afbrigða fyrir henni.