20.02.1961
Efri deild: 63. fundur, 81. löggjafarþing.
Sjá dálk 1401 í B-deild Alþingistíðinda. (1501)

173. mál, sveitarstjórnarlög

Alfreð Gíslason læknir:

Herra forseti. Í 2. gr. þessa frv. segir, að sveitarfélög séu tvenns konar: hreppar og kaupstaðir. Nú er því haldið fram af mörgum, að þetta sé ekki rétt, því að sveitarfélögin séu þrenns konar: hreppar, kaupstaðir og sýslur. M.a. hélt hv. 3. þm. Norðurl. v. þessu fram hér við umr. nýlega og flutti þá till. þess efnis, að í 2. gr. skyldi standa það, sem hann taldi rétt vera, að sveitarfélög séu þrenns konar: hreppar, kaupstaðir og sýslur. Þessi brtt. hv. þm. var felld, og var ég meðal þeirra, sem greiddu atkvæði gegn henni. En það var ekki af því, að ég teldi hann hafa rangt fyrir sér. Þvert á móti er ég þeirrar skoðunar, að það sé réttara og beri að halda því almennt, að sveitarfélög séu þrenns konar. Það, sem réð því, að ég greiddi atkvæði gegn þessari brtt. samt sem áður, var, að ég taldi, að með því að setja þessa breytingu inn í 2. gr. skapaðist nokkur glundroði, því að alls staðar í þessu stóra frv. er talað um sveitarfélög í merkingunni hreppar eða kaupstaðir. Þessu hefðum við því orðið að breyta að mínum dómi í gegnum allt frv., ef till. hefði verið samþykkt. Samt sem áður finnst mér óheppilegt að láta þessa skilgreiningu á, hvað sveitarfélög séu, lögfestast í þessari grein laganna. Ég hef því flutt brtt. um, að þetta yrði orðað á heldur hlutlausari hátt og fram tekið, að með sveitarfélögum væri í lögum þessum átt við hreppa og kaupstaði, án þess að afstaða væri tekin til þess almennt, hvort það skyldi gilda alls staðar.

Hv. 3. þm. Norðurl. v. orðaði þessa uppástungu, þegar hann ræddi þetta mál fyrir nokkru, og með því að hann tekur hana ekki upp sem brtt. af sinni hálfu nú, leyfi ég mér að gera það, því að ég tel þetta vera til bóta, að orðalagið sé haft á þann veg, sem gert er í brtt. á þskj. 392.