07.03.1962
Sameinað þing: 40. fundur, 82. löggjafarþing.
Sjá dálk 715 í D-deild Alþingistíðinda. (3723)

303. mál, ríkislántökur 1961

Fyrirspyrjandi (Eysteinn Jónsson):

Ég vil þakka hæstv. ráðh. fyrir svörin, þó að hann hefði mátt lesa þau aðeins hærra, því að ég átti fullt í fangi með að heyra, hvað hann sagði, enda var mikill þys í deildinni. Þó held ég, að ég hafi heyrt flest það, sem máli skiptir, enda er hægt að athuga það nánar, hvað í þessum upplýsingum felst, sem hér hafa verið gefnar.

En það er tvennt, sem ég tek eftir í þessu sambandi, og annað, sem er alveg nýtt fyrir mér og ég vil vekja athygli á, og það er, að 20 millj., sem ríkisstj. sagðist hafa útvegað stofnlánadeildum landbúnaðarins, hafi verið útvegaðar til bráðabirgða, en ég minnist ekki, að ég hafi heyrt það áður. Ég hélt, að hér hefði verið um lán að ræða, sem hefði verið til frambúðar.

Hitt er, að ég spurði um heimildir fyrir lántökunum, og ég heyrði, að hæstv. ráðherra greindi heimildir fyrir sumum lántökunum og vísaði í því sambandi í 22. gr. fjárlaganna stundum og stundum í ábyrgðarlöggjöf og ýmislegt fleira. En í mörgum dæmunum lét hæstv. ráðherra ekki þess neitt getið, samkv. hvaða lagaheimild lánin væru tekin, og þykir mér það mikill ágallí, því að ef þingmenn eiga að geta fylgzt með því, hvernig lánsheimildirnar eru notaðar, þá þarf að upplýsa það, hvaða lánsheimildir voru notaðar við hverja lántöku fyrir sig, í þessu efni var svörum ráðherra mjög áfátt. Ég tók t.d. eftir því, að ráðherrann tók þannig til orða, að vegamálaskrifstofan hefði tekið 10 millj. kr. að láni til þess að byggja fyrir tiltekinn veg. Þetta er mjög nýstárlegt orðalag. Ég veit ekki til þess, að vegamálaskrifstofan sé sjálfstæð stofnun að einu eða neinu leyti í fjárhagslegu tilliti, heldur aðeins skrifstofa, sem framkvæmir vegagerðirnar með því fé, sem ríkið útvegar til þess, enda gat hæstv. ráðherra ekki um neina lagaheimild til þessarar lántöku. Þetta er 10 millj. kr. lántaka. Og ég vil nú leyfa mér að spyrja hæstv. ráðherra að því, samkv. hvaða lagaheimild þessar 10 millj. hafa verið teknar að láni, hvar sú lagagrein er, sem heimilar slíka lántöku til vegagerða. í þessu falli er um veg að ræða, sem er mjög nauðsynlegt að verði byggður, það mun vera Keflavíkurvegurinn. En það skiptir engu máli í þessu sambandi. Það, sem er aðalatriðið nú í þessu sambandi, er, að ekki séu tekin önnur lán en þau, sem Alþingi hefur heimilað. Ég vil þess vegna spyrjast fyrir um, samkv. hvaða lagaheimild þetta lán hafi verið tekið.

Það mætti líka spyrja um lánin til rafmagnsveitnanna. Ég geri ráð fyrir því, að það séu stórar lánsheimildir í lögum um raforkuveitur hingað og þangað, en mér hefði þótt betra, ef hæstv. ráðh. hefði gert það dæmi upp.

En ég tók sérstaklega eftir þessu með lánið til vegagerðarinnar og spyr hæstv. ráðh. um það.