08.04.1964
Sameinað þing: 59. fundur, 84. löggjafarþing.
Sjá dálk 939 í D-deild Alþingistíðinda. (3426)

810. mál, greiðslur vegna ríkisábyrgða

Bergur Sigurbjörnsson:

Herra forseti. Hæstv. fjmrh. upplýsti það hér áðan, að í I. 1961 hefðu verið sett ákvæði um það, að þeim, sem væri skuldugur ríkissjóði, vegna þess að ábyrgð hefði á hann fallið, skyldi ekki lánað, fyrr en samið hefði verið um þær skuldir. Spurninguna er þá réttara að orða þannig: Hvað strangt er þessu ákvæði fylgt? Nægir t.d. fyrir menn, sem hafa lent í vanskilum við ríkissjóð vegna ábyrgðarskuldbindinga, að stofna nýtt hlutafélag, og geta þeir þá fengið nýjar ríkisábyrgðir, án þess að hafa samið um gömlu skuldirnar? Allir sömu menn eru t.d. í hinu nýja hlutafélagi og voru í því félagi, sem áður lenti í miklum vanskilum við ríkissjóð. Ef þetta er möguleiki, sem almenningur segir að sé og þannig sé málum háttað í dag, þá er sem sagt lagaákvæðið frá 1961 ekki nægilega fullkomið eða eftirlitið með, að því sé fylgt út í æsar, ekki nóg. Lög eru ágæt út af fyrir sig, en það skiptir öllu, að þau nái fyllilega tilgangi sínum, en ekki það, að þau séu sett sem pappírsgagn, sem síðan sé með auðveldu móti sniðgengið.