01.03.1965
Efri deild: 47. fundur, 85. löggjafarþing.
Sjá dálk 732 í B-deild Alþingistíðinda. (523)

3. mál, launaskattur

Eggert G. Þorsteinsson:

Herra forseti. Ég skal á sama hátt lofa því að teygja ekki þessar umr., úr því sem komið er. Það var ég, sem lét í ljós nokkuð snemma í þessum umr. hryggð mína yfir því, um hvað umr. snerust. Það er þess vegna ekki rétt hjá hv. 3. þm. Norðurl. v., að það hafi verið 4. þm. Vestf., sem það gerði, og ég ítreka þessa skoðun mína nú við lok þessarar umr. Mér finnst, að það hafi verið hér deilt um hluti, sem eru orðnir í þessum efnum. Við höfum haldið því fram, stjórnarliðarnir hér, að það hafi áunnizt verulega í þessum efnum, og stöndum óhikað á þeirri skoðun enn þrátt fyrir langar og ýtarlegar umr. Við höfum hins vegar aldrei haldið því fram, eins og hv. 3. þm. Norðurl. v. vildi leggja mér orð í munn hér áðan, að allur vandi þessara mála væri leystur. Það er langt í frá. Ég margtók það fram, bæði í fyrstu og annarri ræðu minni um þessi mál, að það væri mikið ógert, þyrfti mikið enn að gera. En það hefur mjög vel áunnizt í þessum málum, og ég skal endurtaka það, stórkostlega áunnizt miðað við fyrri ár í þessum efnum. Það stendur enn þá óhaggað.

Ég hafði tækifæri til þess að fylgjast með undirbúningi kosninga bæði í Danmörku og Svíþjóð nú á s.l. ári, og í báðum þessum kosningum voru húsnæðismál númer eitt og bar hæst í kosningabaráttunni, þrátt fyrir þá staðreynd, að þessar þjóðir eru komnar langt á undan velflestum þjóðum öðrum einmitt í byggingu íbúðarhúsa, ég vil segja í Evrópu allri, og opinber aðstoð þar hlutfallslega langhæst. Mér er sagt, að það sama sé á döfinni í Noregi, þrátt fyrir það að þeir munu þó vera enn fremstir allra Norðurlandaþjóðanna um félagslega samhjálp í þessum efnum, þá muni það verða eitt af aðalmálunum í þeirra kosningabaráttu. Þannig tala staðreyndirnar, að þessi mál verða kannske aldrei endanlega leyst.

En það, sem hryggir mig af þessum umr., er, að þeir, sem um er rætt, húsbyggjendurnir sjálfir, standa nokkuð svipað eftir umr. sem áður. Hér hafa ekki komið nýjar till. til úrbóta í þessum efnum, og það hefur ekki verið bent á jákvæðar leiðir til enn meiri úrbóta en þegar hafa verið gerðar, þegar eru komnar í framkvæmd og eru að komast í framkvæmd, og það er það, sem mér finnst leiðinlegasta hlið þessara umr. Það hefur verið deilt um það, hvor gerði betur fyrr á árum, hvor hafi verið stærri. En sannleikurinn er sá, að þeir, sem að lögunum eiga að búa, standa eftir þessar umr. jafnilla að vígi og þeir stóðu fyrir þær. Það finnst mér vera leiðinlega hlið þessara mála.

Nú er nauðsynlegt, sagði hv. 3. þm. Norðurl. e., að leggja á skatt til þess að koma þessum málum í bætt og betra horf. Sannleikurinn er sá, að þessi nauðsyn hefur blasað við, allt frá því að opinber afskipti byrjuðu af húsnæðismálum. Verkamannabústaðalöggjöfin, hvernig er hún komin til? Með beinum nefsköttum á íbúa landsins og framlagi úr ríkissjóði, sem líka er aflað með sköttum. Félagsleg samhjálp og opinber afskipti hafa yfirleitt ekki átt í önnur hús að venda um þessi mál. Eigi að síður eða einmitt með hliðsjón af þessu vil ég undirstrika það, að allur starfsgrundvöllur húsnæðismálastofnunarinnar er með þessari fjáröflun miklu öruggari en hann var áður, þegar enginn vissi frá ári til árs, hvað yrði til ráðstöfunar. Þetta vildi ég að kæmi fram til skýringar á þeim ummælum, sem mér voru lögð í munn í fyrri ræðum.