16.02.1966
Sameinað þing: 27. fundur, 86. löggjafarþing.
Sjá dálk 38 í D-deild Alþingistíðinda. (2744)

73. mál, raforkuþörf Vestur-Skaftfellinga austan Mýrdalssands

Helgi Bergs:

Herra forseti. Hv. flm. þeirrar þáltill., sem hér liggur fyrir, drap á í ræðu sinni, að ég hefði flutt frv. í hv. Ed. um rafvæðingu þeirra sveita, sem um ræðir í þessari þáltill., og taldi, að það frv. hefði verið ótímabært, vegna þess að fyrst þyrfti að fara fram ýtarleg rannsókn á því, með hverjum hætti raforkuþörf þessara sveita yrði bezt leyst. Og þessi till., sem hér liggur fyrir, stefnir að því að sú rannsókn fari fram. Ég verð í því sambandi að láta í ljós undrun mína á því, að nú á árinu 1966 skuli hv. þm. upplýsa það, að menn séu ekki búnir að gera sér grein fyrir því, hvernig bezt væri að rafvæða þessar sveitir. Og ég get raunar bætt því við, að ég þykist hafa um það góðar upplýsingar, að svo sé ekki. Menn hafa nefnilega fyllilega gert sér grein fyrir því, að aðrar raunhæfar leiðir en sú að tengja þessar sveitir við núverandi veitukerfi eru í rauninni ekki fyrir hendi. Þetta á enn frekar við núna en nokkru sinni áður, vegna þess að með l. um landsvirkjun frá s.l. ári var vikið frá þeirri stefnu, sem lengi undanfarið hefur verið efst á baugi, nefnilega hin svokallaða smávirkjanaleið, smáar virkjanir fyrir takmörkuð svæði, í stað þess stefnt að stórvirkjunum með stóru veitukerfi. Ég hef kynnt mér það á raforkumálaskrifstofunni, áður en ég flutti frv. það, sem hv. þm. nefndi, að sérfræðingar raforkumálaskrifstofunnar eru þeirrar skoðunar, að það sé ekki um aðra raunhæfa leið í þessu máli að ræða en að tengja þessar sveitir við núverandi veitukerfi. — Þetta vildi ég, herra forseti, að gefnu tilefni láta koma fram.