18.04.1967
Sameinað þing: 37. fundur, 87. löggjafarþing.
Sjá dálk 88 í D-deild Alþingistíðinda. (2225)

184. mál, vegáætlun fyrir árin 1967 og 1968

Frsm. meiri hl. (Jón Arnason):

Herra forseti. Fjvn. hefur haft mál þetta til athugunar og fékk á sinn fund vegamálastjóra, sem gaf n. ýmsar upplýsingar varðandi einstaka liði áætlunarinnar.

Þessi endurskoðun vegáætlunarinnar fer nú fram samkv. 17. gr. vegal., nr. 71 30. des. 1963, en þar er ákveðið, að slík endurskoðun skuli fara fram, þegar vegáætlunin hefur gilt í 2 ár. Á þessu tímabili, sem liðið er frá því að vegáætlunin tók gildi, hafa átt sér stað nokkrar breytingar, bæði á tekjum vegasjóðs og einnig á verðlagi framkvæmda Nettótekjur vegasjóðs munu hafa aukizt um 163.2 millj. á þessu tímabili frá því, sem áætlað var, og hefur það komið sér vel, m.a. til þess að mæta þeim verðhækkunum, sem átt hafa sér stað við framkvæmdirnar almennt. En sá liður áætlunarinnar, sem hækkað hefur verulega, er framlag til vegaviðhaldsins, en það verður á árinu 1967 rúmlega 139 millj. í stað 102.75 millj. samkv. fyrri áætlun og 145 millj. á árinu 1968 í stað 108 millj. kr., sem var í vegáætluninni. Hin gífurlega aukning, sem átt hefur sér stað á bifreiðaeign landsmanna, og stóraukin umferð á vegunum hefur eðlilega leitt til þess, að óhjákvæmilegt er að verja verulega meira fé til vegaviðhaldsins en áður var.

Mestum hluta af því aukna fjármagni, sem kemur til úthlutunar að þessu sinni, er þó lagt til þess að verja til endurbyggingar á mannvirkjum, sem af náttúruhamförum hafa eyðilagzt, og er n. samþykk því, að slík endurbygging sé óhjákvæmileg. Hún hefur því miðað sínar brtt. við þann kafla vegáætlunarinnar, sem fjallar um þær framkvæmdir, við hraðbrautir, þjóðbrautir og landsbrautir, sem verða ekki að öllu greiddar af fé vegasjóðs á ákvörðunartímabilinu, þ.e. aukið lánsfé. Hefur n. því leyft sér að flytja brtt. við þann kafla áætlunarinnar á sérstöku þskj. Þá flytur n. einnig brtt. á þskj. 597, en þar er lagt til að færa fjárveitingu, sem ætluð var til byggingar á brú á Svartá hjá Stafnsrétt, á aðra brú á sömu á hjá Fossum, en það er hjá bænum Stafni norðan Fossár. Með því að staðsetja brúna á þessum stað, kemur hún að meira gagni að dómi vegamálastjóra og fleiri aðila. Þá er lagt til, að fjárveitingu, sem verja skyldi til byggingar brúar á Hvítá hjá Kláffossi, verði varið til byggingar brúar á Hvítá hjá Bjarnastöðum. Þar er ekki um breytingu á upphæð fjárveitingar að ræða, en hún er 2.1 millj. kr.

Þá koma till. n. við III. kafla áætlunarinnar, sem er, eins og ég áðan sagði, við hraðbrautir, þjóðbrautir og landsbrautir, sem verða ekki að öllu leyti greiddar af fé vegasjóðs á áætlunartímabilinu. Þar er fyrst um leiðréttingu að ræða. Það er við hraðbrautir: Vesturlandsvegur. Fallið hefur niður sá hluti upphæðarinnar, sem vinna skyldi fyrir 1968, en aðeins tekin upphæðin, sem var á áætlun 1966, en þá ekki framkvæmt fyrir. Hér er um 12.4 millj. kr. að ræða, og verður þá upphæðin samtals óbreytt eins og hún er í upphaflegri vegáætlun. Þá koma til viðbótar nokkrar fleiri brtt. við þennan kafla. Eru þar heimilaðar nokkrar framkvæmdir við ákveðna vegi, ef til þess kemur, að lánsfé verði aflað til framkvæmdanna. Ég sé ekki ástæðu til þess að lesa upp allar þessar till., en vísa til þess, sem fram kemur á þskj. 588.

Enda þótt n. hafi ekki orðið sammála um afgreiðslu málsins, stendur hún þó sameiginlega að flutningi þessara till., og meiri hl. fjvn. mælir með því, að þessi till. til þál. um endurskoðun vegáætlunar fyrir árin 1967—1968 verði samþ. með þeirri breytingu, sem ég hef nú gert grein fyrir.