08.02.1967
Sameinað þing: 22. fundur, 87. löggjafarþing.
Sjá dálk 517 í D-deild Alþingistíðinda. (2673)

85. mál, rafmagnsmál Austurlands

Eysteinn Jónsson:

Herra forseti. Ég var að tala áðan um þessa sanngjörnu ósk Austfirðinga, að fá fulltrúa í þá n., sem skoðar þessi málefni, og ég ætlaði að gera grein fyrir því, hvað n. er að starfa, með því að vitna til þess, sem hæstv. ráðh. upplýsti um það í umr. einmitt um þessa fsp., þegar hún var

til meðferðar fyrir jólin. En þá segir hæstv. ráðh. um verkefni nefndarinnar:

„Með þetta í huga þótti rétt að afgreiða eigi málaleitun Laxárvirkjunar án þess, að áður hefði farið fram rækileg athugun á þessum samtengingum,“ þ.e.a.s. hugsanlegum, m.a. við Austurland. „Skipaði ráðh. þá n. undir formennsku raforkumálastjóra til þess að rannsaka raforkumál Laxársvæðisins með hliðsjón af málaleitun Laxárvirkjunar og þá jafnframt, hvort hagkvæmt kynni að vera að leysa raforkumál Austurlands og Norðurlands vestra í sameiningu við Laxársvæðið.“

Enn fremur segir hæstv. ráðh. um þetta sama efni, með leyfi hæstv. forseta:

„Eigi þykir ástæða til að skýra frá störfum þessarar n. í einstökum atriðum, enda mun álit hennar liggja fyrir innan skamms, svo sem fyrr segir. Þess skal aðeins getið, að varðandi Austurland eru teknir til samanburðar tveir meginvalkostir í raforkuefnum fyrir svæðið: 1) Virkjun í Lagarfossi. 2) Tenging við Laxársvæðið með háspennulínum. Athugaðar eru mismunandi stærðir virkjunar í Lagarfossi. Gengið er út frá mismunandi forsendum um vöxt raforkunotkunar á Austurlandi, einnig athugað sérstaklega, hver áhrif aukin notkun raforku til húsahitunar þar eystra hefur á niðurstöðurnar.“

Hér þarf ekki frekar vitnanna við. Það er augljóst af því, sem hæstv. ráðh. upplýsir sjálfur, að þessi n. á ekki síður að athuga raforkumálefni Austurlands en Norðurlands, og því finnst okkur sanngjarnt, að í henni séu menn af Austurlandi eins og menn af Norðurlandi til þess að fylgjast með þessu flókna, vandasama og þýðingarmikla máli alveg frá rótum.

Það þarf auðvitað ekki að taka það fram, því að mönnum er það algerlega ljóst, að það getur ekki komið í staðinn fyrir starf í slíkri n., sem hefur svona flókið og umfangsmikið verkefni, þótt einstaka sinnum sé talað við þm. af svæðinu og þeim sagðar nokkrar niðurstöður og bollalagt máske hálfa klukkustund eða svo með nokkurra vikna millibili. Slíkt getur ekki komið í staðinn fyrir nefndarstarf af því tagi, sem þarna er verið að vinna og þarf að vinna. Með sömu rökum hefði mátt segja við þá fyrir norðan varðandi rafmagnsmál þeirra, að þeir þyrftu ekkert að vera í n., því að þm. þeirra gætu komið upp í stjórnarráð og talað við hæstv. raforkumrh. eða talað við sérfræðinga, sem að þessum málum vinna, af og til og það væri alveg jafngilt nefndarstarfinu.

Nei, við skulum gera okkur það alveg ljóst, að þarna er verið að fást við málefni, sem snerta Austurland jöfnum höndum og Norðurland. Því vil ég vænta þess, að hæstv. ráðh., þó að einhver smávægilegur misskilningur hafi komizt inn í þetta mál í sambandi við orðsendingar, sem gefnar hafa verið út, láti það ekki spilla, neitt fyrir skynsamlegri lausn á málinu, en telji eðlilegt að verða við ósk þeirri, sem fram hefur komið um að bæta mönnum af Austurlandi í n., en sú ósk kom frá fundi sveitarstjórnarmanna eða réttaum, sagt fundi, sem haldinn var af sambandi sveitarstjórna á Austurlandi.

Ég vil sem sagt vænta hins bezta í þessu af hendi hæstv. ráðh., að hann bæti þarna mönnum í nefndina.