19.11.1970
Efri deild: 19. fundur, 91. löggjafarþing.
Sjá dálk 670 í B-deild Alþingistíðinda. (484)

6. mál, Lífeyrissjóður bænda

Frsm. (Steinþór Gestsson):

Herra forseti. Eins og nál. á þskj. 158 ber með sér, varð landbn. sammála um að mæla með samþykkt frv. til l. um Lífeyrissjóð bænda, sem er á þskj. 6, sem hér er til 2. umr., með þeirri breytingu, sem n. flytur á sérstöku þskj. nr. 159. Ekki ætti að vera þörf á því að hafa mörg orð um frv. nú, þegar þess er gætt, að hæstv. fjmrh. skýrði það rækilega við 1. umr. í þessari hv. d., svo að mönnum ættu að vera ljós öll helztu málsatriði þess. Þegar nm. tóku að ræða frv., kom það fljótlega í ljós, að það er æðimargslungið, og hver sú breyting, sem mönnum sýndist, að gera mætti til þess að auðvelda eða gera einfaldari framkvæmd l., varð ekki framkvæmanleg nema með mjög róttækum og viðamiklum tilfærslum í því kerfi öllu, sem frv. er byggt á, og eftir nánari skoðun og eftir að hafa fengið skýringar hjá tryggingafræðingi um margs konar tæknileg atriði frv. varð n. sammála um að mæla með því við hv. d., að frv. yrði samþ.

Ég mun ekki fara inn á það að ræða nú einstök efnisatriði frv., enda hefur það verið gert áður, eins og áður sagði, og það rækilega. En mér þykir rétt að benda á það, og á það legg ég áherzlu, að frv. þetta er í meginatriðum í samræmi við till. Búnaðarþings 1970, eins og segir í umsögn stjórnar Búnaðarfélags Íslands. Einnig vil ég vekja athygli á því, að aðalfundur Stéttarsambands bænda 1970 hefur sent Alþ. áskorun um að hraða samþykkt frv., svo að lífeyrissjóðurinn geti tekið til starfa um næstu áramót. Það er gott til þess að vita, að tekizt hefur að finna það form fyrir lífeyrissjóðinn, að stéttarsamtök þeirra, sem hans eiga að njóta, skulu taka frv. jafn heils hugar og raun ber vitni. Bændur hafa í langan tíma haft áhuga á því að koma lífeyrissjóði á laggirnar og hafa bundið miklar vonir við, að hann styrkti aðstöðu þeirra í heild. Ég hef þá trú, að þetta frv., ef að lögum verður, stuðli að eflingu stéttarinnar og landbúnaðarins í landinu. Á það hefur oftlega verið bent, að meðalaldur bænda sé mun hærri en æskilegt og eðlilegt sé. Margir þeirra verða að halda áfram búrekstri miklu lengur en starfskraftar þeirra leyfa, vegna þess að á þann hátt einan er þeim unnt að sjá sér farborða. Lífeyrissjóðurinn mun gerbreyta aðstöðu hinna eldri manna og verða til þess, að kynslóðaskipti verði með eðlilegum hætti innan bændastéttarinnar, en það ætti að tryggja örari þróun atvinnuvegarins og eflingu hans til hagsbóta fyrir þjóðarheildina.

Herra forseti. Að síðustu vil ég gera grein fyrir þeirri einu breytingu, sem n. leggur til, að gerð verði á frv. Til meðferðar er hér einnig í d. frv. til l. um breyt. á l. um Stofnlánadeild landbúnaðarins, sem er fylgifrv. með því frv., sem hér er til umr. Í 19. gr. frv. um Lífeyrissjóð bænda segir svo: „Til ársloka 1985 skal fé til lífeyrisgreiðslna samkv. 18. gr. greitt að 2/5 af Stofnlánadeild landbúnaðarins og að 3/5 úr ríkissjóði.“ En í frv. til l. um breytingu á Stofnlánadeild landbúnaðarins er gert ráð fyrir 37.5% úr stofnlánadeild og 62.5% úr ríkissjóði. Hér er ekki samræmi milli þessara tveggja frv. Hér ber að vísu ekki mikið á milli, en er þó nægilegt til þess, að þetta fær ekki staðizt, og n. hefur því orðið sammála um að breyta þessu á þann hátt, sem gert er ráð fyrir á þskj. nr. 159, sem sé til samræmis við stofnlánadeildarfrv., þannig að 19. gr. frv. um Lífeyrissjóð bænda verði breytt á þann veg, að þar komi 37.5% í hlut stofnlánadeildarinnar, en 62.5% í hlut ríkissjóðs. Ég sé svo ekki ástæðu til að hafa fleiri orð um þetta frv., nema sérstakt tilefni gefist til, en eins og ég hef áður tekið fram, mælir n, með því, að þetta frv. verði samþ. með þeirri breytingu, sem ég hef gert grein fyrir.