20.03.1973
Sameinað þing: 60. fundur, 93. löggjafarþing.
Sjá dálk 2599 í B-deild Alþingistíðinda. (1993)

297. mál, friðuð svæði á Breiðafirði

Sjútvrh. (Lúðvík Jósepsson):

Herra forseti. Fsp. þessi var send Hafrannsóknastofnuninni til umsagnar, og er svar forstöðumanns hennar við þessari fsp. á þessa leið:

„Með tilvísun í bréf ráðuneytisins, dags. 27. febr. s. l., varðandi fsp. Jónasar Árnasonar alþm. um friðuð svæði á Breiðafirði fyrir ákveðnum veiðarfærum, vil ég taka fram eftirfarandi:

Reglugerð sú frá 10. maí 1967, sem hér um ræðir, var sett að frumkvæði Breiðfirðinga til skiptingar flóans milli einstakra veiðarfæra, og er mér ekki kunnugt um, að Hafrannsóknastofnunin hafi verið spurð um fiskifræðilegan grundvöll þessara aðgerða. Ekki er stofnuninni kunnugt um, að þorskur hrygni að nokkru ráði á því svæði, sem hér um ræðir, frekar en í innanverðum Faxaflóa, enda er sjávarhiti á báðum stöðum of lágur á þeim árstíma, sem hrygning þorsks fer fram. Verður því að telja hæpið, að lokun svæðisins fyrir netaveiði hafi haft nokkur veruleg áhrif á hrygningu fisks á þessu svæði, sérstaklega þar sem netaveiði er leyfð alls staðar utan þessa friðaða svæðis.

Hafrannsóknastofnunin hefur haldið uppi kerfisbundnum athugunum á fiskmagni í Breiðafirði, eins og við aðra landshluta, undanfarna áratugi. Ekki er í niðurstöðum þeirra rannsókna sjáanleg nein aukning í fiskgengd á Breiðafirði, sem rekja megi til umræddrar lokunar. Það er kunnara en frá þurfi að segja, að allveruleg áraskipti eru að því, hvort þorskur gengur í fullu magni suður fyrir Reykjanes eða staðnæmist að nokkru leyti norðan við Snæfellsnes. Er talið, að hér sé að mestu um að kenna árlegum sveiflum í hitastigi sjávar. Á árunum 1966–1969 minnkaði vertíðarafli í Breiðafirði verulega, eða úr tæpum 25 þús. tonnum í 10 þús. tonn. Samtímis þessu jókst afli báta úr Grindavík og Þorlákshöfn úr 25 þús. tonnum í 52 þús. tonn. Árið 1970 nam vertíðarafli báta úr verstöðvum á Breiðafirði 18 þús. tonnum, árið 1971 varð hann tæp 16 þús. tonn, en komst upp í tæp 25 þús. tonn á vertíðinni 1972, og það ár var sjávarhiti allmiklu hærri en í meðalári. Rannsóknir „Bjarna Sæmundssonar“ á þessari vertíð sýna, að hiti er einnig hár í ár, og ætti því, ef að líkum lætur, að vera aukinn möguleiki fyrir fiskgengd á Breiðafjarðarmiðum:

Undir þetta skrifar Jón Jónsson, forstöðumaður Hafrannsóknastofnunarinnar.

Ég tel fyrir mitt leyti sjálfsagt, að það fari fram ítarlegri rannsókn en þarna hefur í rauninni farið fram, sérstaklega á þeirri friðun, sem þarna hefur átt sér stað, og ég hef beint til Hafrannsóknastofnunarinnar, að það verði gert. En álit forstöðumanns stofnunarinnar kemur allgreinilega fram í því svari, sem ég hef greint frá.