04.03.1975
Sameinað þing: 45. fundur, 96. löggjafarþing.
Sjá dálk 2108 í B-deild Alþingistíðinda. (1679)

139. mál, lánveitingar úr Byggðasjóði

Oddur Ólafsson:

Herra forseti. Það mun hafa verið ég sem var að tæpa á því að þetta hefði e. t. v. áhrif á útlánastarfsemi annarra sjóða, og ég ætla nú að gefa svolitla skýringu á því hvað ég átti við.

Ég sá það nýlega í blaði, að 10 þús. manna kjördæmi hafði fengið 30% af útlánum eins fjárfestingarlánasjóðsins, en 40 þús. manna kjördæmi hafði fengið 10–11%. Þetta var nú ástæðan til þess að ég gat um þetta, enda hefur maður nú heyrt að Byggðasjóður beinlínis geri það að skilyrði fyrir lánveitingu að lán séu fengin úr öðrum sjóðum, og þetta verður náttúrlega óbeinlínis til þess að ýta undir lánastarfsemi þeirra sjóða á þessi svæði.

Ég er á því, að það þurfi ekkert að breyta reglum eða lögum Byggðasjóðs því að þetta er alveg rétt, að enda þótt fyrir 20–30 árum kunni ástandið að hafa verið svo mjög æskilegt og atvinnuöryggi að koma í Reykjaneskjördæmi, þá held ég að því sé ekki til að dreifa nú. Og það er ekki nokkur vafi á því, að ef við eigum fyrir höndum núna erfiðleika í atvinnu, þá kemur það fyrst niður hér á Reykjavíkur- og Reykjanessvæðinu, þannig að jafnvel með óbreyttum reglum Byggðasjóðs, þá held ég að til þess að viðhalda jafnvægi í byggð landsins verði að fara að lána á þessi svæði.

Ég vil endurtaka að það er álit mitt að útgerðin á Suðurnesjum og endurnýjun skipastólsins hefur stórlega liðið fyrir þetta fyrirkomulag, sem reyndar er ekki lagafyrirmæli, heldur mun vera reglugerðaratriði, beinlínis að lána ekki í þetta kjördæmi, það hafi komið mjög hart niður og séu sérstaklega að koma í ljós núna alveg óvæntir og geysimiklir örðugleikar, m. a. vegna þess að úti um landsbyggðina hefur Byggðasjóður lánað mjög verulega til hraðfrystihúsbygginga. Það hefur ekki verið gert á Reykjanessvæðinu, með afleiðingum sem nú eru að koma í ljós og eru mjög alvarlegar.