18.03.1975
Sameinað þing: 52. fundur, 96. löggjafarþing.
Sjá dálk 2431 í B-deild Alþingistíðinda. (1918)

327. mál, vetrarvegur um Breiðdalsheiði og tenging Djúpvegar við þjóðvegakerfi landsins

Landbrh. (Halldór E. Sigurðsson) :

Herra forseti. Á þskj. 287 er fsp. frá Jóni Baldvin Hannibalssyni sem sat hér á þingi sem varamaður hv. 5. þm Vestf. Ég mun í svari mínu fylgja fsp. eins og hún er orðuð á þskj., en ekki að öðru leyti svara því sem fram kom í framsögu hv. frsm. fyrir fsp. En svarið er samið af vegamálastjóra og er svo hljóðandi:

„Fyrra atriðið í fsp. er á þessa leið: „Hvenær má búast við niðurstöðum frá Vegagerð ríkisins um tilhögun framkvæmda og kostnaðaráætlun vegna lagningar vegar um Breiðadalsheiði, er tryggt geti greiðar samgöngur að vetrarlagi milli byggðarlaga við Djúp og vestan heiðar?“

Svarið hljóðar svo:

„Samkv. Vestfjarðaáætlun var áformað að á árunum 1965–1968 yrðu gerð um 540 m löng jarðgöng í Breiðadalsheiði til þess að fá öruggari samgöngur milli byggðarlaga við Djúp og vestan heiðar. Jarðfræðilegar rannsóknir sýndu að barglög lágu þannig miðað við legu jarðganga að fara þyrfti gegnum mörg millilög. Tilraunaboranir og sprengingar við fyrirbugaðan gangamunn leiddu í ljós að bergið var svo feyskið og millilögin svo laus í sér, að ef gera hefði átt jarðgöng á þessum stað hefði þurft að fóðra þau jafnóðum og þau voru sprengd. Hefði þetta gert gangagerðina bæði seinlega og mjög dýra. Var því fallið frá þessari lausn, a. m. k. í bili, meðan leitað væri annarra úrræða, en vegurinn í kinnungunum beggja vegna breikkaður og hækkaður verulega. Lausnir, sem m. a. eru taldar koma til greina og athugaðar hafa verið, eru þessar:

1. Að grafa og sprengja klauf niður í háskarðið og nota efnið, sem úr henni kemur, í vegfyllingar beggja vegna, byggja síðan þak yfir klaufina í hæfilegri hæð og fylla svo með jarðefni yfir. Má því segja, að hér sé einnig um göng að ræða þótt öðruvísi sé fyrir komið en þeim sem áður voru ráðgerð.

2. Vegsvalir yfir veginn í kinnungunum annars vegar eða beggja vegna háskarðsins. Hér er um það að ræða að byggja yfir veginn þar sem snjóþyngslin og hættan af snjóflóðum er mest.

3. Jarðgöng mun ofar en upphaflega var gert ráð fyrir með miklum fyllingum við gangamunnana. Er með þessari lausn stefnt að því að komast með göngin í þykkari berglög og velja stefnuna þannig að ekki þurfi að fara í gegnum nema fá millilög.

Allar þessar lausnir eru mjög dýrar og þarfnast nánari rannsókna. Til þess að þær komi að gagni, ef til kemur, þarf að ganga úr skugga um hvort hægt sé með tiltækum ráðum að ryðja veginn neðan við efsta kaflann á háheiðinni. Standa nú yfir tilraunir á þessu sviði. Eftir illviðriskaflann í jan. var hafist handa að ryðja veginn upp á háheiðina Ísafjarðarmegin með snjóblásara og er ætlunin að athuga, hvort halda megi honum opnum til vors, hvort þurfi að endurbæta hann o. s. frv. Eigi er ljóst, hvort þessar tilraunir þurfa að standa yfir í fleiri vetur. Jafnframt verður haldið áfram frekari athugunum á þeim lausnum sem að ofan greinir og að því stefnt að niðurstaða geti legið fyrir við endurskoðun vegáætlunar 1976.“

Því er hér við að bæta sem kom í ljós eftir að þetta svar var samið, að tilraunir þær, sem hafa verið gerðar með snjóblásara á þessum stöðum, hafa eftir fregnum að dæma gefið góða raun.

„Annað atriði fsp: Hvað líður rannsóknum Vegagerðarinnar á vegarstæði er tengi Djúpveg við aðalþjóðvegakerfi landsins?“

Svarið er svona:

„Eftir að ákveðið var í vegáætlun 1972–1975 að gera Djúpveg akfæran á áætlunartímabilinu var farið að athuga hvort endurbyggja ætti núverandi veg um Þorskafjarðarheiði eða leggja nýjan veg úr Djúpi um Kollafjarðarheiði. Hefur verið unnið að þessum athugunum undanfarandi tvö ár. Lokið er við mælingar á veginn inn fyrir Þorskafjörð, út fyrir Hallsteinsnes, yfir og fyrir Djúpafjörð og Gufufjörð, fyrir Skálanes og um Kollafjörð. Einnig hafa verið mældar veglínur yfir Ódrjúgsháls og Hjallaháls. Á árunum 1968–1969 var gerð dýptarmæling fyrir mynni Þorskafjarðar milli Reykjaness og Skálaness, eins og greint var frá í svari við fsp. um þetta atriði á Alþ. á s. l. hausti. Loks er mæling á 13 km löngum kafla á Þorskafjarðarheiði og merkingum með snjómælistikum á þeirri leið. Fylgst hefur verið með snjóalögum á Þorskafjarðarheiði og Kollafjarðarheiði undanfarandi 2 ár og er ráðgert að ljúka mælingum veglínu yfir báðar heiðarnar og setja niður snjómælistikur á þeim leiðum í ár. Einnig er áformað að gera svipaða könnun á leið um Steingrímsfjarðarheiði niður í Steingrímsfjörð. Stefnt er að því, að samanburður á kostnaði á þessum leiðum geti legið fyrir við endurskoðun vegáætlunar árið 1976.“

Þetta er það svar sem vegamálastjóri gefur við þessum fsp., og ég vona að hv. fyrirspyrjandi eða staðgengill hans hér láti sér þetta nægja.