18.03.1975
Sameinað þing: 52. fundur, 96. löggjafarþing.
Sjá dálk 2445 í B-deild Alþingistíðinda. (1938)

332. mál, hitaveita á Hólastað og í nágrannasveitarfélögum

Fyrirspyrjandi (Páli Pétursson) :

Herra forseti. Ég hef á þskj. 350 leyft mér að bera fram svo hljóðandi fsp. til landbrh.:

„Er ekki hæstv. landbrh. fús til þess að beita sér fyrir því að gerð verði könnun á því, hvort ekki sé á Reykjum í Hjaltadal nægur jarðhiti til þess að ráðlegt sé að koma upp hitaveitu fyrir skólasetrið á Hólum, enda náist samkomulag um undirbúning að gerð hitaveitu þessarar við eiganda Reykja og við Hólahrepp og e. t. v. Hofshrepp og Hofsós?“

Tilefni þessarar fsp. er það, að eins og allir vita er rekinn á Hólum í Hjaltadal bændaskóli. Skóli þessi á sér langa og merka sögu og Hólar eiga sér langa og gagnmerka sögu sem skólasetur. Það er okkur norðlendingum mikið áhugamál að framtíðarstaða þessarar menntastofnunar verði sem best tryggð. Hólar eiga sér glæstari sögu en flestir aðrir staðir hér á landi, hafa verið höfuðból að fornu og nýju, biskupssetur og menntasetur um margar aldir og svo nálægt í vitund okkar norðlendinga að allt frá dögum Jóns helga höfum við sagt „heim að Hólum“. Enginn annar staður á landinu getur státað af slíku. Það er að mínum dómi mjög mikilvægt að kanna sem best og sem fyrst hvort jarðhiti þar í nágrenninu, þ. e. a. s. á Reykjum í Hjaltadal, sé ekki nægur til að koma upp hitaveitu fyrir Hólastað og nágrenni. Á Reykjum í Hjaltadal er fyrir hendi jarðhiti, en engar rannsóknir hafa farið þar fram.

Nokkru eftir að ég bar fram þessa fsp. barst okkur þm. Norðurl. v. afrit af bréfi frá skólastjóra Bændaskólans á Hólum til Orkustofnunar þar sem m. a. var fundargerð frá fundi sem oddvitar þeirra sveitarfélaga, sem hagsmuna eiga að gæta í þessu sambandi, höfðu haldið með sér og mun ég nú lesa þessa ályktun, með leyfi hæstv. forseta:

„Árið 1975, hinn 21. febr., komu saman til fundar að Hólum í Hjaltadal oddvitar Hofsós-, Hofs-, Viðvíkur- og Hólahreppa ásamt skólastjóra Bændaskólans á Hólum. Til fundarins hafði boðað skólastjóri og tilefni fundarins var að ræða og gera ályktanir um hitaveitukannanir að Reykjum í Hjaltadal, en þar er eina heita vatnið sem vitað er um á svæði þessara fjögurra hreppa. Hitaveitumálin voru rædd frá ýmsum hliðum og sýndist fundarmönnum einhlítt að leita til Orkustofnunar um að hún láti nú þegar kanna hitasvæðið og gera aðrar frumathuganir þar að lútandi. Þá samþ. fundurinn að leita til viðkomandi þm. kjördæmisins um að fylgja þessum ályktunum eftir við viðkomandi aðila.

Fleira er ekki tekið fyrir og fundi slitið.“

Undir þetta hafa ritað:

Jón Guðmundsson, oddviti Hofshrepps.

Gísli Kristjánsson, oddviti á Hofsósi.

Guðmundur Stefánsson, oddviti Hólahrepps.

Björn Gunnlaugsson, oddviti Viðvíkurhrepps.

Haraldur Árnason, skólastjóri á Hólum.

Það er sem sagt ljóst af þessu bréfi sem ég var að lesa að heimamenn sýna þessu hitaveitumáli mikinn áhuga, og það er augljóst að þeir óska mjög eindregið eftir því að þessi könnun verði gerð, enda væri mjög mikilvægt fyrir þessi byggðarlög ef hægt væri að koma á fót sameiginlegri hitaveitu fyrir þau. Þarna er um allstórt þorp að ræða, Hofsós og þéttbýli á Sleitubjarnarstöðum og blómlegar sveitir í Hjaltadal, Viðvíkursveit og Óslandshlíð.