15.04.1975
Sameinað þing: 63. fundur, 96. löggjafarþing.
Sjá dálk 2909 í B-deild Alþingistíðinda. (2203)

340. mál, rannsókn rækjumiða við Grímsey

Sjútvrh. (Matthías Bjarnason) :

Herra forseti. Rækjumiðin við Grímsey fundust í des. 1969 af skipi Hafrannsóknastofnunarinnar. — Ári síðar voru miðin aftur könnuð af Hafrannsóknastofnuninni og síðan hafa rannsóknaskip komið þarna af og til. Miðvikudaginn 9. þ. m. hóf rannsóknaskipið Dröfn að kanna þessi rækjumið og jafnframt að leita að öðrum líklegum rækjumiðum fyrir Norðurlandi. Niðurstöður þessa leiðangurs munu ekki liggja fyrir fyrr en í lok þessa mánaðar, en þó er vitað að rækja hefur fundist í einhverju magni í Axarfirði. Rannsóknaskipið Dröfn mun ljúka leiðangri sínum 20. þ. m., en 25. maí mun rannsóknaskipið Hafþór halda áfram þessum rækjuathugunum og vera við þær í 3 vikur.

Síðari spurningunni verður að svara neitandi, en vonandi verða menn nær um þetta að loknum þeim rannsóknaleiðöngrum sem áður eru nefndir. Annars er erfitt að gera sér grein fyrir veiðiþoli ákveðinna veiðisvæða áður en farið er að stunda þar veiðar að nokkru ráði,

Síðan rækjumiðin við Grímsey fundust hafa ýmsir rækjubátar reynt þarna fyrir sér túr og túr án þess að hægt sé að segja að um nokkurn árangur hafi verið að ræða hjá þeim. Má væntanlega kenna því um að útbúnaður þessara báta hafi ekki verið nægilega góður. Nú um nokkurt skeið hefur einn bátur stundað þessi mið eftir því sem gæftir hafa leyft og hefur árangur hans verið það góður að margir hafa nú tekið að sýna þessum miðum áhuga. Hafa nú fleiri tekið að stunda veiðar á þessum miðum og hefur árangur þeirra einnig verið dágóður. Eins og fyrr segir hafa þó hvorki veiðarnar né rannsóknir Hafrannsóknastofnunarinnar enn náð því marki að hægt sé að segja til um stærð og veiðiþol þessa rækjustofns, en líklegt er að þekking okkar á þessu muni aukast mjög á næstunni.