27.04.1977
Efri deild: 65. fundur, 98. löggjafarþing.
Sjá dálk 3783 í B-deild Alþingistíðinda. (2704)
172. mál, umferðarlög
Frsm. (Eggert G. Þorsteinsson):
Herra forseti. Frv. það, sem hér er til umr. og flutt er af hv. 12. þm. Reykv., hefur verið tekið fyrir á þremur fundum í allshn., og eins og fram kemur á þskj. 535 mælir n. einróma með samþykkt frv. með tveimur brtt. sem hún gerir nánast til áréttingar og nánari skýringa á meginefni þess.
Ég tel ekki þörf á að efni þess sé rakið ítarlegar en gert var við 1. umr. málsins. Það er afar einfalt að auðkenni á bifreiðum, sem frv. fjallar um, verði gerð svo glögg og skýr að ekki þurfi að fara á milli mála að þar sé um almenningsvagna að ræða, sem eru háðir tímasetningu um viðkomustaði, en oft fer sú áætlun úr skorðum af þeim sökum sem frá hefur verið skýrt við 1. umr. málsins, að einkabifreiðar virða ekki þá nauðsyn að vagnarnir fylgi áætlun.
Þær breytingar, sem n. leggur til á þskj. 536, voru einnig, eins og efni frv. í heild, samþykktar einróma af allshn. sem leggur til að frv. verði samþ. með breytingum þeim sem ég áður greindi.
