velsældarhagkerfið.
Virðulegur forseti. Ég þakka hv. þm. Halldóru Mogensen fyrir að vekja máls á þessu máli og hæstv. ráðherra fyrir svör hennar. Ég varð þeirrar gæfu aðnjótandi að taka þátt í starfshópnum sem lagði til þessa mælikvarða og áframhaldandi vinnu og verð að segja að það er með skemmtilegri verkum sem ég hef tekið að mér sem þingmaður. Það var áhugavert, virðulegur forseti, að skoða hvað önnur lönd eru að gera í þeim efnum og ég get alveg fullvissað hv. þingheim um það að við hefðum getað verið með nokkur hundruð mælikvarða ef því er að skipta, því að um leið og farið er að kafa ofan í þau mál vakna ýmsar spurningar. En á endanum, til þess að þetta skili einhverjum árangri og sé raunverulegt mælaborð eins og við sjáum það fyrir okkur, er auðvitað mikilvægt að afmarka sig.
Eins og öllum hér er kunnugt voru lagðir til 39 mælikvarðar. Það er líka rétt, eins og fram kom í máli forsætisráðherra, að við áttuðum okkur á því við vinnuna að það skortir svolítið á töluleg gögn, sérstaklega þegar kemur að umhverfisþáttunum og málum er tengjast félagslegum auði. Svo segjum við í niðurstöðum okkar að við leggjum til að stjórnvöld móti afstöðu til þess með hvaða hætti þau nýti sér mælikvarðana við stefnumótun.
Mig langaði kannski aðeins að koma inn á það, virðulegur forseti, að við sjáum í skýrslunni svona mælikvarða og við sjáum hvar við erum að fara upp og hvar við erum að fara niður og hvar við stöndum í stað. Það er nú svo að á Íslandi erum við í mjög miklum lúxus í öllum alþjóðlegum samanburði, meira og minna, þannig að þegar við berum okkur saman við erlend ríki stöndum við iðulega mjög vel. Það er gott og ágætt að minna sig á það því að stundum þegar maður hlustar á umræðuna í þingsal er eins og hér sé allt að fara í bál og brand, en það er alls ekki svo. Það breytir því ekki að við erum stöðugt að vinna að frekari framþróun, þannig að það er eitt að horfa á alþjóðlega mælikvarða og annað að horfa á það hvert við miðum. Við eigum auðvitað alltaf að setja viðmiðið hærra. Við eigum alltaf að huga að enn meiri velsæld og lífsgæðum fyrir íslenskt samfélag.
