velsældarhagkerfið.

Hæstv. forseti. Ég þakka hv. þm. Halldóru Mogensen þessa umræðu um velsældarhagkerfið og mælikvarða á velsæld og lífsgæði. Ég er sammála því að mikilvægt sé að mæla aðra en efnahagslega þætti þegar fjallað er um hagsæld og lífsgæði þjóðar þó að sú nálgun útiloki ekki að setja slíka lífsgæðamælikvarða í samhengi við klassíska efnahagslega mælikvarða eins og landsframleiðslu og hagvöxt. Það hlýtur ávallt að gilda um alla mælikvarða að þeir verði stýritæki stefnumótunar og við setjum þá í samhengi við hvaða sögu þeir eiga að segja okkur og gefi sterkar vísbendingar um afrakstur eða árangur verkefna, geri okkur kleift að bera okkur saman við til að mynda aðrar þjóðir á þeirri vegferð að bæta samfélag okkar, hvort heldur efnahagslega, félagslega eða, eins og hæstv. forsætisráðherra fór yfir, að mæta áskorunum eins og í loftslagsmálum og umhverfismálum og aðra þá þætti eða ákvarðanir sem hafa áhrif á daglegt líf okkar. Slík notkun mælikvarða tónar afar vel við stefnumótandi lagaumhverfi opinberra fjármála og er jafnan mikið rætt á vettvangi hv. fjárlaganefndar, ekki síst í samtali við ráðuneyti, að við metum aðgerðir á þeim 35 málefnasviðum og yfir 100 málaflokkum með mælikvörðum sem geri kleift að meta miklu skilvirkar en okkur er fært í dag í vinnu við ríkisfjármálaáætlun og fjárlög að meta árangur og ávinning aðgerða. Sjálfbærni hlýtur þar að vera lykilhugtak, hvort sem það á við daglegt líf okkar eða bara ríkisfjármálin sjálf þar sem við horfum á stöðugan raunvöxt útgjalda í krónum talið.

Ég fagna því sem hæstv. forsætisráðherra fór yfir um næstu skref og að innleiða eða tengja mælikvarðana skipulagi opinberra fjármála og horfa þegar til næstu ríkisfjármálaáætlunar.