skýrsla Ríkisendurskoðunar um framkvæmd fjárlaga.

Herra forseti. Nú hefur Ríkisendurskoðun sent Alþingi skýrslu sína um framkvæmd fjárlaga fyrir tímabilið janúar–júní 2013, eins og venja er. Þar segir meðal annars um rekstur A-hluta ríkissjóðs, með leyfi forseta:

„Innheimtar tekjur A-hluta ríkissjóðs á fyrri hluta ársins voru 260,2 milljarðar kr. og greidd gjöld 276,9 milljarðar kr. Greiðsluhalli ríkissjóðs var því 16,7 milljarðar kr. […]

Fjárlög ársins 2013 gera ráð fyrir að greiðsluhalli ríkissjóðs verði 21,0 milljarður kr.“ — Eðli málsins samkvæmt fellur hann gjarnan til með meiri þunga á fyrri hluta fjárlagaársins.

„Til samanburðar er í fjárlögum áætlað að rekstrarhalli ríkissjóðs á árinu verði 3,7 milljarðar kr., …“

Um þetta segir svo Ríkisendurskoðun:

„Greiðsluhalli ríkissjóðs um mitt ár var heldur minni en áætlanir tímabilsins gerðu ráð fyrir …“

Það er sem sagt heldur betri útkoma á greiðslujöfnuði en áætlanirnar höfðu gert ráð fyrir. Sé samræmi yfir í rekstrarafkomuna mundi þetta að breyttu breytanda ekki benda endilega til þess að endanleg útkoma ríkissjóðs á þessu ári á rekstrargrunni yrði mjög frábrugðin því sem fjárlög gerðu ráð fyrir.

Ég vil því spyrja hæstv. forsætisráðherra:

1. Er ekki ánægjulegt að þessar vísbendingar frá Ríkisendurskoðun bendi til þess að fjárlögin standi á sæmilega traustum grunni?

2. Voru hæstv. forsætisráðherra og hæstv. fjármálaráðherra hugsanlega fullfljótir á sér þegar þeir héldu sérstakan blaðamannafund fljótlega eftir stjórnarskipti til að útmála miklu verri horfur í afkomu ríkisins, augljóslega til að reyna að skella skuldinni fyrir fram á fráfarandi ríkisstjórn?

3. Er ekki ástæða til að ætla að fjárlög gætu staðist nokkurn veginn ef ekki hefði komið til að núverandi ríkisstjórn (Forseti hringir.) hefur með ákvörðunum um minni tekjur og aukin útgjöld (Forseti hringir.) gert dæmið um 7 milljörðum kr. verra?