fjármálastefna 2018--2022.

Herra forseti. Hæstv. fjármálaráðherra talar um svigrúm til skattalækkana. En af hverju ekki svigrúm til að setja meira í barnabætur? Hæstv. fjármálaráðherra hafnaði þeirri tillögu fyrir nokkrum vikum. Af hverju er ekki svigrúm til að bæta í vaxtabætur? Af hverju er ekki svigrúm til að láta Landspítalann ná að halda í horfinu? Af hverju er ekki svigrúm til að bæta kjör öryrkja og aldraðra? Þetta eru allt hópar og stofnanir og úrræði velferðarkerfisins sem ég myndi einmitt halda að við ættum að nota svigrúmið til að bæta. Það er einmitt það sem fjármálaráð m.a. segir, að við þurfum að setja meira í innviði. Það kostar að vanrækja innviðina. Þess vegna er það skynsamleg hagfræði að mínu mati og betri pólitík að nýta sér það svigrúm sem m.a. skýrist af jákvæðum ytri áhrifum. Nýta það til að bæta í innviðina, í þær stofnanir sem við búum við, minnka ójöfnuðinn, gera samfélagið okkar betra fyrir alla. Sóknarfærið er svo augljóst hvað þetta varðar.

Hæstv. fjármálaráðherra minntist á evruna. Hann talar eins og gengisfelling sé bara einhver töfralausn. Hver borgar fyrir gengisfellingu? Það er alltaf almenningur. Almenningur borgar alltaf fyrir gengisfellingu. Þetta vita allir sem þekkja eitthvað til hagstjórnar, gengisfelling er hrikaleg leið til að rétta af lífskjörin. Hún verður ekki ókeypis. Ef við hefðum haft evruna í aðdraganda hrunsins eða í hruninu hefðum við ekki upplifað þessa svokölluðu tvíburakreppu. Við hefðum upplifað bankakreppu en ekki gjaldeyriskreppu. Evran hrundi ekkert þrátt fyrir erfiðleika í Evrópu. Krónan okkar hrundi svo gersamlega niður í gólf að það hálfa væri nóg.

Svo má minnast sérstaklega á það að flest stærstu fyrirtæki Íslands gera nú þegar upp í evrum. Það finnst mér ótrúleg ósanngirni. Af hverju má Þorsteinn í Samherja gera upp í evrum á sama tíma og fiskvinnslukonan sem vinnur hjá honum þarf að gera upp í krónum?