kílómetragjald á ökutæki.
Virðulegi forseti. Hv. þingmaður hefur ekki hlustað mikið á það sem ég var að segja og ég bið hv. þingmann að hlusta. Umræða um það hvort við eigum að hækka skatta eða hækka gjöld á banka er allt önnur umræða. Hér erum við að tala um að breyta úr kerfi sem er vont, sem er ósanngjarnt, sem leggst mismunandi á fólk á ósanngjarnan hátt og skilar aukinheldur engum tekjum til ríkissjóðs, og að lokum þegar við búin með orkuskiptin þá eru 0 kr. til að setja í uppbyggingu vega. Við erum jú að hugsa það þannig að þeir sem nota vegina borgi fyrir þá og þeir sem menga borgi fyrir þá losun. Og það er alrangt hjá hv. þingmanni að þetta sé skattahækkun. Það er alrangt. Það er hins vegar verið að gera þetta með réttlátari hætti. Það er verið að lagfæra galla í núverandi kerfi. Það er t.d. verið að segja að þeir sem keyra á jafn þungum bensín- og dísilbíl borgi það sama fyrir notkun á veginum, sem þeir gera ekki í dag. Það er verið að segja að rútur sem eru jafn þungar og vörubíll borgi það sama fyrir notkun á veginum, sem þær gera ekki í dag. Og við erum að taka inn þætti sem við ætlum að trappa inn á nokkrum árum, sem eru erfiðir, m.a. vegna flutninga, vegna hópferðabifreiða, og við erum að setja inn hvata. Þannig að þetta er alrangt hjá hv. þingmanni.
Og þegar hann fór með rulluna um að þeir sem eru á eldri bílum, stærri bílum sem eyða meira borgi meira, þá er það akkúrat öfugt. Það hefur nú kannski verið aðaláskorunin í þessari umræðu að það eru þeir sparneytnari, vegna þess að þeir hafa greitt minna á síðustu árum, sem fara að greiða meira, sem er sanngjarnt vegna þess að þeir nota vegina jafn mikið og hinir. Það er eldsneytisgjaldið og kolefnisgjaldið sem rukkar síðan fyrir mengunina. Þetta er notkunin.
Svo vil ég segja að upp úr aldamótum skilaði kostnaður þeirra sem eiga bíl svona sirka 2,1% af vergri landsframleiðslu. Við erum að stefna hér að 1,5. Það er lækkun upp á 0,6 frá því hvernig hlutirnir voru fyrir aldamót eða rétt um aldamótin, 2003, 2004, 2005.
