svört atvinnustarfsemi.
Frú forseti. Ég held að það sé mjög mikilvægt að unnið verði úr þeim vísbendingum sem koma fram í átakinu sem verið hefur í gangi. Ég bendi hv. þingmönnum á að það er þó verið að takast á við þessi mál, m.a. með þessu átaki og með því að stórefla bæði ríkisskattstjóraembættið og skattrannsóknarstjóraembættið þar sem ráðnir hafa verið 15–20 nýir starfsmenn og þrátt fyrir erfiðleika lagðir auknir fjármunir í að vinna betur úr þessum málum.
Ég verð að hryggja hv. þingmann, Morgunblaðið og aðra með því að því miður eru vísbendingar af þessu tagi ekki nýjar af nálinni. Þær eiga bara, að því er virðist, ekkert skylt við þær breytingar í skattamálum sem farið hefur verið í undanfarin missiri nema síður sé vegna þess að margar þeirra breytinga hafa styrkt skattframkvæmdina og tvímælalaust stoppað upp í göt sem þar voru fyrir áður, samanber til dæmis reglur um samstæðuskattlagningu íslenskra móðurfélaga og dótturfélaga erlendis. Þar var stórt gat í fyrirkomulaginu.
Þessu til sanninda dreg ég hérna fram skýrslu starfshóps um umfang skattsvika á Íslandi frá því í desember 2004. Það var fyrir þessar miklu skattbreytingar sem við eigum að hafa staðið fyrir. Hver var meginniðurstaða þeirrar skýrslu sem þáverandi fjármálaráðherra fékk í hendur? Með leyfi forseta segir þar:
„Að gefnum þeim fyrirvörum sem í skýrslunni eru um aðferð nefndarinnar við að meta skattsvik hérlendis er það niðurstaða úttektarinnar að tekjutap ríkis og sveitarfélaga vegna skattsvika geti verið 8,5% til 11,5% af heildarskatttekjum ríkis og sveitarfélaga.“ (Gripið fram í.)
Með öðrum orðum gerðu menn ráð fyrir því að allt að 10% færu fram hjá og skiluðu sér ekki af heildartekjum ríkis og sveitarfélaga. Þó að það séu vissulega alvarlega vísbendingar að upp undir 12% í litlum og meðalstórum fyrirtækjum fari með einhverjum hætti fram hjá, það sem kallað er þá svört starfsemi, (Forseti hringir.) ætti miðað við þessar vísbendingar úr skýrslunni árið 2004 að mega komast að þeirri niðurstöðu að þetta væri um það bil óbreytt að umfangi. (Gripið fram í.)
