lögfesting samnings Sameinuðu þjóðanna um réttindi fatlaðs fólks.

Frú forseti. Ég beini spurningu til hæstv. félags- og húsnæðismálaráðherra er varðar frumvarp sem ráðherrann mælir fyrir hér síðar í dag í tengslum við lögfestingu samnings Sameinuðu þjóðanna um réttindi fatlaðs fólks. Ég las mig í gegnum málið og í sjötta lið greinargerðarinnar þar sem er fjallað um mat á áhrifum segir, með leyfi forseta: „Er því ekki gert ráð fyrir því að frumvarpið hafi áhrif á fjárhag ríkissjóðs …“ Og áfram heldur örlítið síðar í greinargerðinni, með leyfi forseta: „Er ekki gert ráð fyrir því að frumvarpið hafi áhrif á fjárhag sveitarfélaga …“ Matið er sem sagt það að frumvarpið hafi hvorki áhrif á fjárhag ríkissjóðs né sveitarfélaga.

Þessi fyrirspurn mín snýst ekki um hagsmuni og réttindi fatlaðs fólks per se heldur mat á áhrifum frumvarpsins, kostnaðarmat. Nú erum við nýbúin að fylgjast með því að ríkisstjórnin ákvað að taka yfir tvo útgjaldaþætti sveitarfélaga, til að styðja við sveitarfélögin til að ráða við kostnað við nýgerða kjarasamninga við kennara, nánar tiltekið börn með fjölþættan vanda og uppbyggingu hjúkrunarheimila. Mig langar til að spyrja hæstv. ráðherra út í þetta. Nú birtist á fundi sem Samtök sveitarfélaga á höfuðborgarsvæðinu áttu með þingmönnum höfuðborgarkjördæmanna í kjördæmaviku mat á þessum kostnaði. Þetta mat, þegar búið er að taka til hliðar það sem snýr að fjölþættum vanda, er hvorki meira né minna en 14,4 milljarðar á ári. Og hér segir í greinargerð frumvarpsins að málið hafi ekki áhrif á fjárhag ríkissjóðs og ekki áhrif á fjárhag sveitarfélaga.

Mig langar bara að biðja hæstv. ráðherra að útskýra stuttlega þessa mjög svo ólíku sýn hæstv. ráðherra eins og fram kemur í greinargerðinni og mat sveitarfélaga á þeim kostnaði sem á þeim lendir að frumvarpinu samþykktu.