fjárlög 2025.
Virðulegi forseti. Ég get tekið undir langflest sem hv. þingmaður segir um mikilvægi þessara greina í fjölmörgum áskorunum samtímans en það má ekki rugla þessu saman. Þó að við séum að leggja áherslu á hluti þar sem við stöndum augljóslega verr og mikil vöntun er þá er það ekki svo að ekki sé lögð áhersla á eitthvað annað eða það bitni á því. Nýtt reiknilíkan bitnar ekki á félags- og hugvísindum. Það er sókn fyrir alla starfsemi háskólans. Þar eru fámennar samfélagslega mikilvægar greinar að njóta umbunar og samfélagslegt hlutverk háskólanna skilgreint í fyrsta sinn. Það munu auðvitað koma inn fjölmargar áskoranir á þessu sviði eins og það að við erum að leggja áherslu á íslenska tungu, þverfaglegt nám þar sem við erum að blanda saman þessum greinum við aðrar greinar og leyfa háskólunum að koma upp með hugmyndir þar sem eru óþrjótandi tillögur að því hvernig við getum tvinnað saman nám í mismunandi greinum fyrir nýjar námsleiðir o.s.frv. Þannig að þó að áherslan sé á það að við erum að mennta færri í þessu heldur en löndin sem við berum okkur saman við en miklu fleiri í félags- og hugvísindum þá bitnar það ekki á þeim greinum.
Í fyrra reiknilíkaninu, í því gamla sem var nú fryst, má líka segja að þá hafi að stórum hluta til verið horft til reikniflokka. Nú er horft til miklu breiðara hlutverks háskóla og þeirra staða því öll að eflast til að takast á við áskoranir sem eru margar af þeim sem hv. þingmaður reifar hér í spurningu sinni. Þannig að þrátt fyrir þessa áherslu þá er það algjörlega skýrt að þau eru ekki að koma verr út. Við höfum verið að mennta fleiri í þessum greinum þegar við berum okkur saman við Norðurlöndin og það hefur aðeins veikt samkeppnisstöðu okkar en það er ekki þar með sagt að það sé verið að gera lítið úr þeim greinum eða veikja þær með einhverju móti í sjálfu reiknilíkaninu.
