fjárlög 2025.
Herra forseti. Ekki veit ég hvernig hv. þingmaður fær það út að þessa spurningu sé með einhverjum hætti hægt að tengja við fjárlagaumræðu, en það er sjálfsagt að svara. Það er auðvitað þannig að okkar reynslumestu og klárustu sérfræðingar í landinu hafa sannarlega lesið meira en almenna lögfræði. Þeir eru nánast allir algjörlega á þeirri skoðun að þetta sé bæði þarft, mikilvægt og góð útfærsla og fari alls ekki gegn stjórnarskrá. Það þarf auðvitað að halda því til haga að þessi umrædda bókun er 30 ára gömul og henni er ekki verið að breyta. Það er ekki verið að breyta orðalagi bókunarinnar og það er ekki verið að taka neina nýja ákvörðun. Þetta frumvarp, sem ég er ekki einu sinni búin að mæla fyrir og er ekki búið að dreifa á þinginu, breytir engu varðandi bókun 35. Þetta snýst um breytingu á lögum um EES-samninginn vegna dóma Hæstaréttar sem skerða rétt íslenskra borgara samkvæmt EES-samningnum. Að mati æðsta dómstóls í landinu er það þannig. Ég veit ekki hvernig hv. þingmaður ætlar að færa rök fyrir því að það sé ekkert mikilvægi í því og ekkert þurfi að gera þegar æðsti dómstóll í landinu kemst að þeirri niðurstöðu að við séum að skerða rétt íslenskra borgara samkvæmt EES-samningnum, réttindi sem þeir eiga samkvæmt samningnum, af því að við höfum ekki innleitt þessa bókun með réttu orðalagi í allan þennan tíma. Það er niðurstaða Hæstaréttar sem ekki hefur komið hérna fram til þessa. Markmið frumvarpsins er að leiðrétta þetta misræmi. Þetta snýst ekki um það að einhver útlensk lög komi og taki yfir íslensk lög. Þetta snýst um það að þegar íslensk lög og önnur, sem hafa farið í gegnum sömu þinglegu meðferð hér á þingi og löggjafarvaldið hefur tekið ákvörðun um að samþykkja, skarast á þá erum við í samræmi við 30 ára gamla ákvörðun að segja hvernig hún hafi verið túlkuð og Hæstiréttur segir að þurfi að taka fram með hvaða hætti er gert. Út á það gengur frumvarpið.
