fjárlög 2026.

Virðulegi forseti. Það er svo sannarlega mikil krafa í samfélaginu og ekki síst úti á landi um nútímavæðingu innviða og vegakerfisins, t.d. malarvega til sveita og tengivega og á fleiri stöðum. Stefna ríkisstjórnarinnar er skýr. Hún birtist m.a. í sumar í viðbótarframlagi upp á 3 milljarða kr. til viðhalds. Hún birtist í fjárauka — og gott að hv. þingmaður hafi fylgst með ræðu minni á miðvikudagskvöld — sem gildir frá 2026–2030, um stóraukið fé til viðhalds og þjónustu vega. Þetta er 45% hækkun varðandi viðhaldið og við munum stoppa þá innviðaskuld.

Varðandi hina skýru stefnu, hvaða jarðgöng eru fyrst, þá ætla ég ekki hér að fara að lesa upp úr samgönguáætlun sem ég mun mæla fyrir í lok október eða byrjun nóvember. Forgangsröðunin verður gerð kunnug þar. Það er búið að spyrja mig að þessu margoft, hvaða jarðgöng verða fyrst o.s.frv. Það mun koma í ljós síðar. Þessi kyrrstaða sem er búin að vera í jarðgangagerð, hver er hún? Jú, hún er einfaldlega sú að síðasta ríkisstjórn — það er ekki búið að grafa nein jarðgöng síðan 2020, í fimm ár. Við ætlum hins vegar að hefja að öllu óbreyttu af fullum krafti jarðgangagerð árið 2027. Það er skýr stefna. Hin skýra stefna blasir við í fjáraukanum sem var samþykktur í sumar og í þessu fjárlagafrumvarpi. Það er um gríðarlegar hækkanir að ræða. Stefna og fjármögnun innviða kemur í raun fram í samgönguáætlun. Ég get ekki mælt fyrir henni fyrr en ég raunverulega mæli fyrir skjalinu, svo það liggi algerlega fyrir. Þetta liggur algerlega skýrt fyrir og stefnan er skýr hvað okkur varðar. Við ættum að leggja áherslu á innviði og rjúfa þessa kyrrstöðu. Það er vert að spyrja sig: Hvernig stendur á því að við fórum ekki í jarðgangagerð eftir Dýrafjarðargöngin með Covid-peningunum o.s.frv.?