fjárlög 2026.
Virðulegur forseti. Varðandi kostnað í útlendingamálum þá held ég að það sé algjörlega óumdeilt á Alþingi að hann hefur vaxið mjög og það hefur raunar verið tröllvöxtur í útgjöldum. Um tímabilið frá 2012 þá verðum við kannski að geta horft á hlutina í einhverju raunsamhengi; hverjir voru að koma til Íslands árið 2012 og sækja hér um alþjóðlega vernd. Sóknin hefst í kringum 2017. Í kringum 2017 er það sem tölurnar að fara að rísa og rísa verulega, annars vegar árin 2017–2021 og svo sjáum við 2022–2024, en þá er mikil aukning. Þar er tvennt að gerast; það er Úkraína og síðan sjálfstæð ákvörðun um Venesúela. Það breytir ekki því að ríkisstjórnin er mjög skýr um það og samhent að við erum að stíga markviss skref um að færa löggjöfina okkar nær því sem annars staðar tíðkast, fjarlægja séríslenskar reglur sem hafa verið ákveðnir seglar, t.d. um það að hafi umsóknir ekki verið afgreiddar innan 18 mánaða þá leiði það sjálfkrafa til jákvæðrar niðurstöðu um alþjóðlega vernd. Sú ákvörðun leiðir síðan til réttinda um framfærslu til tveggja ára og það hefur lent á sveitarfélögunum sem síðan lendir í endurkostnaði af hálfu ríkisins.
Í ár er umsóknum um alþjóðlega vernd að fækka og fækka nokkuð verulega. Það er stefna ríkisstjórnarinnar og það er trú mín að hér sé starfandi ríkisstjórn sem horfir á þennan málaflokk með skynsömum augum: Jú, við ætlum að halda áfram að taka á móti flóttamönnum, það ætlum við sannarlega að gera. Og jú, við viljum taka vel á móti því fólki sem hingað kemur til lands af því að því fylgja raunveruleg tækifæri til þátttöku í samfélaginu. En ég er ósammála þingmanninum um það að við hættum að taka á móti fólki. Ég er ósammála því, ég er algjörlega ósammála því. En ég vil að við séum með stjórn á aðstæðum, við séum með stjórn á málaflokknum, við séum með stjórn á landamærum, við séum ekki að soga hingað til lands t.d. alþjóðlega glæpahópa. Við erum að stíga skref til að ná stjórn á aðstæðum og erum að lækka kostnað allverulega í þessum málaflokki.
