fjárlög 2026.

Virðulegur forseti. Svo ég byrji bara á því sem hv. þingmaður endaði á þá er það vissulega hlutverk háskólaráðuneytisins að fylgjast með gæðamálum háskóla og við erum auðvitað bara með vakandi auga á því frá tíma til tíma. Hér hefur í vetur, sem betur fer, kannski í fyrsta skipti í langan tíma og kannski hv. þingmanni að miklu leyti að þakka, verið mikil umræða um menntun í landinu og hún skiptir okkur gríðarlegu máli. Hér tölum við um vaxtarplan og við tölum um atvinnustefnu sem skiptir máli en ef færibandið frá leikskóla, grunnskóla, framhaldsskóla og háskóla getur ekki skilað fólki inn í það umhverfi er til lítils barist. Þannig að ég tek undir með hv. þingmanni að það þarf að skoða þetta eins og auðvitað bara allar greinar sem er verið að kenna í háskóla og ég mun taka þetta til umhugsunar.

Varðandi gervigreindina þá er það alveg rétt að hún getur hjálpað okkur gríðarlega. Við getum haldið samkeppnisstöðu okkar gagnvart útlöndum, við getum einfaldað mjög margt í umsýslu, aukið þjónustu fólks og við getum skapað meiri verðmæti. Við þurfum hins vegar að tryggja að allir hafi grunnþekkingu á henni þannig að það verði ekki mikið bil á milli þeirra sem betur eru settir og þeirra sem eru verr settir. Alveg eins og í loftslagsmálunum er þetta spurning um réttlát umskipti. Síðan eru auðvitað stórkostleg tækifæri á einstökum sviðum eins og í heilbrigðisþjónustu. Hugsið ykkur, það er hægt að gera fleiri hluti, það er hægt að gera þá jafnvel betur í einhverjum tilfellum, þjónustan getur náð til fleiri óháð búsetu. Við verðum einfaldlega að nýta okkur þetta, annars drögumst við aftur úr. Síðan vona ég seinna í vetur að maður geti átt gott samtal við þingheim og hæstv. ráðherra um áskoranirnar sem fylgja líka, lýðræðishættuna og allt það sem fylgir gervigreindinni.