fjárlög 2023.

Forseti. Ég þakka hv. þingmanni fyrir svarið. Eins og hann var að lýsa þessu hljómar það svolítið eins og þátttakan í orkuskiptum verði væntanlega bara fyrir þá betur settu í samfélaginu, þá sem hafa efni á rafbíl. Ég á nú ekki rafbíl enn þá en þekki fólk sem á rafbíl og það er alveg rétt, þegar þú keyrir rafbíl finnst þér þú vera að taka þátt í orkuskiptunum og leggja þitt af mörkum við að koma í veg fyrir útblástur koltvísýrings út í andrúmsloftið sem hækkar hitastig jarðar. Ég vona að allir í samfélaginu eigi kost á því, ekki bara efnafólkið, og að hinir fátæku sitji ekki eftir með slæma samvisku.

Mig langar að spyrja hv. þingmann um beina ábyrgð Íslands á losun gróðurhúsalofttegunda. Losun sem fellur undir beina ábyrgð Íslands nam 2.716 kílótonnum koltvísýringsígildis fyrir árið 2020, sem er samdráttur um 13% í losun frá árinu 2005 og varð 5% samdráttur milli áranna 2019–2020. Mesta aukningin sem fellur á beina ábyrgð Íslands á síðustu árum, án stóriðju, er frá vegasamgöngum, jarðvarmavirkjunum og vegna notkunar kælimiðla, losun frá farskipum er einnig undir. Til að ná markmiði um 55% samdrátt í losun gróðurhúsalofttegunda á beinni ábyrgð Íslands árið 2030 miðað við 2005, 25 ár, má losun árið 2030 ekki nema meira en 1,5 milljónum tonna koltvísýringsígildis. Þetta er mismunur upp á 1,3 milljónir tonna koltvísýringsígildis miðað við losun árið 2020. Þá er mikilvægt að við getum fylgst með árangri aðgerðanna, að þær skili árangri sem fyrst. Er einhver von að við náum þessum markmiðum um 55% samdrátt og erum við að fylgjast nægilega vel með árangri þessara aðgerða sem við erum að fara í? Sjáum við árangur af markmiðunum? Nefna má rafbíla — er útblástur farinn að minnka hlutfallslega miðað við notkun bifreiða?