tekjur og gjöld ríkissjóðs.

Virðulegur forseti. Síðasta sumar stóðu yfir umræður hér sem enduðu með aukinni skattlagningu á sjávarútveginn með hækkun veiðigjalda eins og menn muna. Því var haldið fram að sú skattahækkun myndi skipta sköpum í innviðauppbyggingu hér, ætti að skila einum 7,6 milljörðum í ríkissjóð og átti í rauninni að fjármagna allt fyrir alla. Við meðferð fjárlagafrumvarpsins núna, milli 2. og 3. umræðu, er að koma í ljós að heildartekjur af veiðigjöldum, heildartekjurnar sem áttu að vera 23 milljarðar, eru núna 16 milljarðar og tekjur af þessari hækkun töluvert minni en áætlað var þótt ekki sé kannski hægt um vik að slá á þá tölu.

Fjárlagafrumvarpið færði okkur hins vegar um leið, og miðað við þessar nýju tölur varðandi veiðigjöldin, fjórfalda skattahækkun á venjulegt fólk miðað við þá hækkun sem átti að vera og verður á veiðigjöldum. Það fylgdi með í kaupinu fjórföld hækkun á venjulegt fólk, með kílómetragjaldi, með hækkun á vörugjöldum, innviðagjöldum, lífeyrissjóðsgjöldum og öðru slíku, fjórföld hækkun á venjulegt fólk.

Það fór um mann svolítill hrollur í svari hæstv. forsætisráðherra sem tiltók það sérstaklega og lagði áherslu á að þessi ríkisstjórn væri rétt að byrja. Ég hlýt að spyrja hæstv. fjármálaráðherra hvort hann sjái fyrir sér viðlíka skattahækkanir í framhaldinu miðað við þetta og einnig hvort hann telji hafa verið tilefni til að grípa hér til fordæmalauss ákvæðis, að ljúka umræðu (Forseti hringir.) um veiðigjöldin síðasta sumar með 71. gr. þingskapalaga í ljósi þess (Forseti hringir.) að eftirtekjan er nú ekki meiri en raun ber vitni.