afleiðingar krónutöluhækkunar gjalda á vísitölu neysluverðs.

Virðulegi forseti. Ég ætla ekki að ganga eftir svari við spurningu hv. þm. Sigmundar Davíðs Gunnlaugssonar sem kallaði nú á margar spurningar. Vonandi er búið að dreifa fyrirspurn frá mér því þetta er með slíkum ólíkindum. Það er ekki þannig að það geti farið frá ríkisstjórninni.

Virðulegi forseti. Hæstv. forsætisráðherra, formaður Samfylkingarinnar, gekk hér fram fyrir kosningar og var með mjög skýr skilaboð. Það átti ekki að hækka skatta á venjulegt fólk og ekki hækka skatta á vinnandi fólk. Það er búið að hækka núna skatta um 60 milljarða á tveimur árum. Það er búið að hækka tekjuskattinn. Á síðasta ári hafði það áhrif á um 14.500 pör, 2,8 milljarðar. Núna eru barnabætur og vaxtabætur, annað er fallið niður og hitt er raunlækkun upp á tæplega 2. Aftur er gengið í tekjuskattinn upp á 3,1 milljarð. Svo eru það auðvitað krónutölugjöldin. Látum vera bílaskattana. Ég spyr, virðulegur forseti: Er þetta ekki venjulegt fólk sem borgar þessa skatta? Er þetta ekki vinnandi fólk sem borgar þessa skatta? Ef þetta er ekki venjulegt fólk og þetta er ekki vinnandi fólk, hvaða fólk er það þá?

Virðulegur forseti. Ég vil fá skýrt svar hvað þetta varðar því þetta skiptir máli.

Sömuleiðis, virðulegi forseti, er til nokkuð sem heitir fjármálaráð. Það er fagráð sem samanstendur af lærðum hagfræðingum sem hafa komið með ábendingar um fjármálaáætlun núna tvisvar. Ríkisstjórnin hefur ekki orðið við neinum af þessum ábendingum. Ég spyr annars vegar: Telur hæstv. forsætisráðherra að það gæti verið, vegna þess að það hefur ekki verið hlustað á fjármálaráð, að þá hafi vextir hækkað, þvert á það sem var lofað? (Forseti hringir.) Svo er hitt: Úr því að það er ekki farið neitt eftir fjármálaráði, stendur til af ríkisstjórninni að leggja það af?