lífeyrisréttindi hjá lífeyrissjóðum með aukna örorkubyrði.
Virðulegur forseti. Ég held að það hafi nánast allt verið rangt sem hv. þingmaður flutti hér. Það er rétt að við erum að takast á við verkefni sem kom til í kjarasamningum árið 2006 þegar lífeyrissjóðirnir voru með innan við 1.000 milljarða eignir, þ.e. að örorkubyrði þeirra er misjöfn. Hún hefur sannarlega þróast með misjöfnum hætti en það er rétt, sem hv. þingmaður taldi upp, að það eru nokkrir sjóðir þar sem örorkubyrðin er sannarlega meiri. Í dag eru lífeyrissjóðirnir sennilega að nálgast 8.000 milljarða í eignum og hvort það verði aðalatriðið að 0,1%, eða innan við það, komi beint úr ríkissjóði til að hjálpa lífeyrissjóðunum við að jafna örorkubyrði allra eða hvort það er hægt að finna nýtt kerfi þar sem jöfnun innan lífeyrissjóðanna myndi taka á þessu, það er verkefni sem á að leysast 2026. Það gæti kannski þurft eitt ár enn en áformin eru 2026. Samtalið er hafið. Sú breyting sem nú er að verða er fyrst og fremst sú að þeir lífeyrissjóðir sem hafa ekki aukna lífeyrisbyrði, ekki þessir sjóðir sem hv. þingmaður er að telja upp heldur allir hinir sjóðirnir sem hafa notið góðs af þessum greiðslum, þær greiðslur ætlum við að taka til baka og segja: Við erum að breyta um örorkukerfi frá og með 1. september á næsta ári. Það verða umtalsverðar breytingar á fyrirkomulaginu og þær greiðslur sem við erum að bæta í eru sennilega 18 milljarðar á ársbasis. Við erum að tryggja að þeir sjóðir sem eru með aukna byrði, sem hv. þingmaður taldi réttilega upp, verði ekki fyrir skerðingu. Þannig að þetta er rangt upp sett hjá hv. þingmanni. Og hvort það séu ekki djúpir vasar þegar um er að ræða 8.000 milljarða lífeyrissjóði (Forseti hringir.) á sama tíma og ríkið er að stórauka sín framlög til örorku, (Forseti hringir.) þá getum við tekið þá málefnalegu umræðu á málefnalegan hátt.
