Aðrar útgáfur af skjalinu: PDF - Word Perfect. Ferill 155. máls.
133. löggjafarþing 2006–2007.
Þskj. 493  —  155. mál.



Svar


menntamálaráðherra við fyrirspurn Björgvins G. Sigurðssonar um brottfall úr framhaldsskólum.

    Fyrirspurnin hljóðar svo:
    Hvert var brottfall úr íslenskum framhaldsskólum á síðasta ári
     a.      sundurliðað eftir kynjum og skólum á vorönn og haustönn, og
     b.      sundurliðað eftir bóknámi og verknámi?

    Þær tölfræðiupplýsingar sem hér eru lagðar fram um brottfall úr framhaldsskólum eru unnar af Hagstofu Íslands og sýna hlutfall þeirra nemenda í dagskóla sem hurfu frá námi frá hausti 2004 til hausts 2005, sjá eftirfarandi töflur. Brottfall telst 16,4% meðal dagskólanemenda á þessu tímabili. Hlutfallstölur um brottfall fyrir einstaka skóla eru mjög mismunandi. Samanburðarhæfar upplýsingar fyrir Norðurlönd liggja ekki fyrir.
    Sú vinnuaðferð sem notuð er við að reikna út brottfall tekur mið af við skráðum nemendum í dagskóla samkvæmt nemendaskrá Hagstofu Íslands um miðjan október 2004 og fjöldi þeirra er borinn saman við fjölda skráðra nemenda í öllum skólum innan lands um miðjan október 2005. Þeir nemendur sem samkvæmt prófaskrá Hagstofu Íslands útskrifuðust ekki á þessu tímabili og voru ekki skráðir í skóla haustið eftir teljast samkvæmt þessari skilgreiningu brottfallnir. Nemendur á námssamningi eru taldir með eftir því sem upplýsingar liggja fyrir. Hér er einungis um að ræða eina leið til að skilgreina brottfall.
    Þar sem gagnaöflun Hagstofu Íslands um nemendafjölda í framhaldsskólum miðast einungis við fjölda nemenda um miðjan október ár hvert er ekki unnt að greina brottfall eftir önnum.
    Tölur um brottfall frá hausti 2005 til hausts 2006 munu liggja fyrir hjá Hagstofu Íslands í janúar 2007.
    Fyrirvara verður að hafa á því að telja alla þá nemendur brottfallsnemendur sem fyrrgreind tala og töflurnar sýna enda ljóst að brottfall er oft tímabundið og að margir þessara nemenda hefja nám að nýju. Sveigjanlegt og opið skólakerfi hér á landi gerir nemendum kleift að hverfa tímabundið frá námi. Oft er um að ræða nemendur sem af eðlilegum ástæðum kjósa að hverfa frá námi um tíma. Varasamt er því að telja alla þá nemendur sem gera hlé á námi sínu brottfallsnemendur. Ljóst er einnig að atvinnuástand hér á landi hefur áhrif á skólasókn. Eftirspurn eftir vinnuafli hér hefur verið mjög mikil á undanförnum árum. Aðstæður á vinnumarkaði erlendis eru víða gjörólíkar aðstæðum hér á landi. Í mörgum Evrópulöndum veldur mikið atvinnuleysi til langs tíma því að stjórnvöld reka þá stefnu að halda nemendum í skóla eins lengi og unnt er. Samanburður milli landa getur því verið varasamur.
    Hér verður einnig gerð grein fyrir hve hátt hlutfall þeirra nemenda sem samkvæmt fyrrgreindri skilgreiningu töldust brottfallnir 2002–2003 og 2003–2004 hafði hafið nám að nýju til og með hausti 2005.
    Af þeim sem töldust brottfallnir 2002–2003 höfðu samkvæmt nemendaskrá Hagstofu Íslands samtals 43,8% hafið nám að nýju haustið 2004 og haustið 2005. Af þeim sem töldust brottfallnir 2003–2004 höfðu samkvæmt sömu skrá 29,6% hafið nám að nýju haustið 2005.
    Framangreindar tölur um endurkomu nemenda sem töldust brottfallnir sýna ljóslega að brottfall er oft og tíðum tímabundið.

Brottfall nemenda á framhaldsskólastigi, 2004–2005.

Vinnuaðferð: Taldir eru saman nemendur í dagskóla á framhaldsskólastigi í völdum skólum (sjá neðar) um miðjan október 2004 samkvæmt nemendaskrá Hagstofu Íslands og þeir bornir saman við skráða nemendur í öllum skólum innan lands (framhaldsskólum, háskólum, sérskólum og tónlistarskólum) um miðjan október 2005. Nemendur haustið 2004 sem ekki voru í námi haustið 2005 voru bornir saman við útskrifaða nemendur í öllum skólum frá 1. desember 2004 til 30. nóvember 2005 samkvæmt prófaskrá Hagstofu Íslands. Þeir nemendur sem hvorki hafa útskrifast á þessu tímabili né koma fram í nemendaskrá haustið 2005 teljast vera brottfallnir þetta ár.
Heildarbrottfall:
Fjöldi nemenda í dagskóla haustið 2004 19.347
Nemendur í dagskóla haustið 2004 sem ekki koma fram í neinum skóla á framhaldsskólastigi og háskólastigi innan lands haustið 2005
4.914
Þar af brautskráðir frá 1. desember 2004 til 30. nóvember 2005 1.739
Látnir 16. október 2004 til 15. október 2005 5
    Brottfallnir nemendur frá hausti 2004 3.170
    Brottfall í % 16,4
Nemendur 2004 Brottfall, fjöldi Brottfall, %
Brottfallnir eftir kyni:
Karlar 9.760 1.773 18,2
Konur 9.587 1.397 14,6
Alls 19.347 3.170 16,4
Brottfallnir eftir flokkun náms:
Bóknám 12.304 1.621 13,2
Starfsnám 7.043 1.549 22,0
Alls 19.347 3.170 16,4
Brottfallnir eftir skólum:
Borgarholtsskóli 1.012 212 20,9
Fjölbrautaskóli Norðurlands vestra 379 87 23,0
Fjölbrautaskóli Snæfellinga 132 36 27,3
Fjölbrautaskóli Suðurlands 858 159 18,5
Fjölbrautaskóli Suðurnesja 796 172 21,6
Fjölbrautaskóli Vesturlands 609 89 14,6
Fjölbrautaskólinn í Breiðholti 1.156 224 19,4
Fjölbrautaskólinn í Garðabæ 620 80 12,9
Fjölbrautaskólinn við Ármúla 927 155 16,7
Flensborgarskóli 595 83 14,0
Framhaldsskólinn á Húsavík 153 44 28,8
Framhaldsskólinn á Laugum 104 30 28,8
Framhaldsskólinn í A-Skaftafellssýslu 129 53 41,1
Framhaldsskólinn í Vestmannaeyjum 222 42 18,9
Garðyrkjuskólinn á Reykjum 35 3 8,6
Hólaskóli á Hólum í Hjaltadal 33 5 15,2
Hraðbraut – menntaskóli 131 23 17,6
Hússtjórnarskólinn á Hallormsstað 20 2 10,0
Hússtjórnarskólinn í Reykjavík 24 0 0,0
Iðnnemar á samningi utan skóla 649 140 21,6
Iðnskólinn í Hafnarfirði 553 174 31,5
Iðnskólinn í Reykjavík 1.498 496 33,1
Kvennaskólinn í Reykjavík 561 24 4,3
Kvikmyndaskóli Íslands 39 4 10,3
Landbúnaðarháskólinn á Hvanneyri 35 4 11,4
Listdansskóli Íslands 1 0 0,0
Menntaskólinn að Laugarvatni 140 10 7,1
Menntaskólinn á Akureyri 663 26 3,9
Menntaskólinn á Egilsstöðum 301 32 10,6
Menntaskólinn á Ísafirði 339 62 18,3
Menntaskólinn í Kópavogi 1.021 164 16,1
Menntaskólinn í Reykjavík 832 12 1,4
Menntaskólinn við Hamrahlíð 1.045 71 6,8
Menntaskólinn við Sund 771 43 5,6
Myndlistaskólinn á Akureyri 8 0 0,0
Myndlistaskólinn í Reykjavík 23 2 8,7
Snyrtiskóli Reykjavíkur 47 7 14,9
Stýrimannaskólinn í Reykjavík 77 16 20,8
Tannsmiðaskóli Íslands 12 0 0,0
Tækniháskóli Íslands 163 39 23,9
Verkmenntaskóli Austurlands 173 51 29,5
Verkmenntaskólinn á Akureyri 1.122 231 20,6
Verslunarskóli Íslands 1.097 19 1,7
Vélskóli Íslands 195 40 20,5
Viðskiptaháskólinn á Bifröst 47 4 8,5
Alls 19.347 3.170 16,4
Athugasemdir: Nemendur á almennri braut eru taldir með nemendum í bóknámi og nemendur í listnámi með nemendum í starfsnámi. Nemendur eru stundum skráðir í fleiri en einn skóla. Þá eru þeir í nemendaskrá Hagstofu Íslands settir í þann skóla þar sem þeir stunda aðallega nám. Þó eru nemendur í listaskólum sem líka stunda nám annars staðar settir í aðra skóla en listaskóla.

B rottfallnir 2002-2003 og 2003-2004 sem hófu nám að nýju til og með hausti 2005.

Brottfallnir 2002-2003 sem hófu nám að nýju haustin 2004 og 2005
Fjöldi % brottfallsnema % brottfallsnema, uppsafnað
Brottfallnir 2002-2003 2.749
Í nám 2004 894 32,5 32,5
Í nám 2005 311 11,3 43,8
Samtals 1.205 43,8 43,8
Brottfallnir 2003-2004 sem hófu nám að nýju haustið 2005
Fjöldi % brottfallsnema % brottfallsnema, uppsafnað
Brottfallnir 2003–2004 3.102
Í nám 2005 919 29,6 29,6
Samtals 919 29,6 29,6
Skýringar: Skoðuð voru afdrif brottfallinna nemenda með samanburði á nemendaskrá og prófaskrá Hagstofu Íslands. Athugaðir voru nemendur haustið 2002 sem voru ekki skráðir í skóla haustið eftir og nemendur haustið 2003 sem voru ekki í skóla haustið 2004. Athugað var hvort þessir nemendur höfðu skilað sér aftur í skóla til og með hausti 2005.