Ferill 545. máls. Aðrar útgáfur af skjalinu: PDF - Word Perfect.
144. löggjafarþing 2014–2015.
Þingskjal 1081 — 545. mál.
Svar
umhverfis- og auðlindaráðherra við fyrirspurn frá Katrínu Jakobsdóttur
um rannsóknir á loftslagsbreytingum við Norður-Atlantshaf.
1. Hefur verið gerð framkvæmdaáætlun um átak í loftslagsrannsóknum við Norður-Atlantshaf í samræmi við þingsályktun þess efnis nr. 8/132, sem samþykkt var á Alþingi 2. júní 2006?
Í þingsályktun um átak í rannsóknum á loftslagsbreytingum við Norður-Atlantshaf segir: „Alþingi ályktar, með hliðsjón af ályktun Vestnorræna ráðsins á ársfundi 2004, að fela ríkisstjórninni, í samvinnu við landsstjórnir Færeyja og Grænlands, að semja framkvæmdaáætlun um markvisst átak í rannsóknum á loftslagsbreytingum við Norður-Atlantshaf.“
Fjölmargar rannsóknir á þessu sviði eru í gangi og ráðuneytið leitast eftir bestu getu við að hafa yfirsýn yfir rannsóknirnar og draga niðurstöður þeirra saman, sbr. eftirfarandi. Engin eftirfylgni hefur átt sér stað til að hrinda þingsályktuninni í framkvæmd og framkvæmdaáætlun því ekki verið gerð.
2. Hefur verið unnið að rannsóknum á loftslagsbreytingum í samræmi við ákvæði fyrrnefndrar þingsályktunar? Ef svo er, í hverju hafa þær rannsóknir falist, hefur verið gerð grein fyrir niðurstöðum þeirra og þá hvar? Ef svo er ekki, hvaða skýringar eru á því?
Unnið er að margvíslegum rannsóknum sem tengjast loftslagsbreytingum á Íslandi á einn eða annan hátt, þótt ekki sé unnið eftir sérstakri framkvæmdaráætlun í samræmi við efni þingsályktunartillögunnar. Umhverfisráðuneytið lét tvisvar taka saman vísindalegar upplýsingar um loftslagsbreytingar í skýrsluformi, en síðasta skýrsla þess efnis kom út 2008. Veðurstofa Íslands hafði forystu um það starf. Nýrri upplýsingar er að finna í 6. landsskýrslu Íslands til loftslagssamnings Sameinuðu þjóðanna, sem út kom 2014.
Margar rannsóknir af þessu tagi fara fram í fjölþjóðlegri samvinnu, m.a. með norrænni þátttöku og styrkjum.
Umhverfisráðuneyti stóð fyrir alþjóðlegri ráðstefnu í Reykjavík í september 2006 í samvinnu við menntamálaráðuneyti, sjávarútvegsráðuneyti og utanríkisráðuneyti undir heitinu: North Atlantic Climate and Ecosystems – A Current Threat? Þar var dregin saman besta vísindaleg þekking varðandi samspil loftslags, hafstrauma og lífríkis hafsins í Norður- Atlantshafinu í ljósi loftslagsbreytinga og fluttu þar erindi m.a. vísindamenn frá Íslandi, Færeyjum og Noregi. Tilefni ráðstefnunnar var m.a. vísindalegar tilgátur um að loftslagsbreytingar gætu haft þau áhrif að breyta eða hægja á flæði Golfstraumsins og varpaði hún ljósi á bestu vísindalegu þekkingu hvað það varðar og almennt á áhrifum loftslagsbreytinga á hafið og lífríki þess á Norður-Atlantshafi.
Nú fer fram vinna á vegum stjórnvalda við undirbúning Parísarfundarins um loftslagsmál í desember 2015. Hún miðast fyrst og fremst að því að skoða möguleika á að draga úr nettólosun gróðurhúsalofttegunda, en síður að aðlögun að loftslagsbreytingum eða rannsóknum á áhrifum þeirra. Samhliða er þó fyrirhugað að gera nýja vísindaskýrslu, hina 3. í röðinni, og mun Veðurstofan að beiðni ráðherra leiða hóp sérfræðinga frá stofnunum og háskólum við gerð hennar.
