Ferill 62. máls. Aðrar útgáfur af skjalinu: PDF - Word Perfect.
144. löggjafarþing 2014–2015.
Þingskjal 585 — 62. mál.
Svar
dómsmálaráðherra við fyrirspurn frá Össuri Skarphéðinssyni
um eftirlitsstjórnvöld/eftirlitsaðila.
Við vinnslu svars við fyrirspurninni var við afmörkun efnisins miðað við að um væri að ræða stjórnvöld er fara með sérstakt eftirlit á vegum hins opinbera með starfsemi einstaklinga og fyrirtækja á grundvelli sérhæfðra eftirlitsreglna, sbr. ákvæði laga nr. 27/1999, um opinberar eftirlitsreglur, og reglugerð um eftirlitsreglur hins opinbera nr. 812/1999. Framangreind lög ná ekki til stjórnsýslueftirlits og innra eftirlits hins opinbera, þar með talið löggæslu, reynslulausn og ákærufrestun, sbr. 2. mgr. 1. gr. laganna.
1. Hvaða ríkisstofnanir, sem heyra undir ráðherra, gegna hlutverki eftirlitsstjórnvalda/ eftirlitsaðila? Svar óskast sundurliðað eftir málaflokkum og tegundum eftirlits.
Í ljósi framangreindrar skilgreiningar er lögreglan eina embættið sem heyrir undir dómsmálaráðherra og gegnir hlutverki eftirlitsstjórnvalds.
Lögreglustjórar fara með eftirlit á grundvelli:
a. Laga nr. 85/2007, um veitingastaði, gististaði og skemmtanahald, en 21. gr. laganna kveður á um eftirlit lögreglustjóra við framkvæmd laganna.
b. Vopnalaga, nr. 16/1998, er varðar framleiðendur, innflytjendur og söluaðila skotvopna, skotfæra og skotelda auk handhafa skotvopnaleyfa. Lögreglustjórar hafa t.d. heimild til að fá aðgang að húsnæði þeirra sem framleiða eða geyma birgðir af skotvopnum, skotfærum, skoteldum eða sprengiefni, sbr. 2. mgr. 9. gr. laganna.
c. Laga nr. 96/2002, um útlendinga, að því er varðar framkvæmd laga um atvinnuréttindi útlendinga, nr. 97/2002, en einnig komu, dvöl og för úr landi.
d. Áfengislaga, nr. 75/1998, varðandi leyfisskylda starfsemi tengdri framleiðslu, innflutningi og heildsölu áfengis í atvinnuskyni, einnig eftirlit með dvöl ungmenna á veitinga- og skemmtistöðum. Hér er kveðið á um eftirlitið skv. 4. mgr. 4. gr. laganna en þar segir að lögregla, tollgæsla og skattyfirvöld annist eftirlitið.
Í öllum tilvikum er um vettvangseftirlit lögreglu að ræða eða eftirlit í kjölfar kvörtunar.
2. Telur ráðherra þörf á því að yfirfara athugunar- og rannsóknarheimildir með það fyrir augum að samræma og bæta efni þeirra? Ef svo er, hvaða atriði eða þætti þyrfti að samræma eða bæta?
Eftirlitsheimildir lögreglu, eins og fram kemur í 1. tölul. fyrirspurnarinnar, eru í öllum tilfellum lögbundnar. Endurskoðun á lagaumgjörðinni fer fram reglulega eða þegar tilefni er til.
3. Telur ráðherra þörf á að samræma og bæta framkvæmd eftirlits af hálfu eftirlitsstjórnvalda/eftirlitsaðila betur en nú er? Ef svo er, hvaða atriði eða þætti þyrfti helst að samræma eða bæta?
Yfirfara þarf framkvæmdina með reglulegu millibili.
4. Hafa einhver mistök átt sér stað við framkvæmd eftirlitsstjórnvalda/eftirlitsaðila síðustu ár? Ef svo er, hvers konar mistök var þá um að ræða?
Ráðuneytinu er ekki kunnugt um að mistök hafi átt sér stað við framkvæmd framangreinds eftirlits á síðustu árum.
