Ferill 244. máls. Aðrar útgáfur af skjalinu: PDF - Word Perfect.
145. löggjafarþing 2015–2016.
Þingskjal 1188 — 244. mál.
Svar
innanríkisráðherra við fyrirspurn frá Helga Hrafni Gunnarssyni um kyrrsetningu loftfara.
Fyrirspurnin hljóðar svo:
Hversu oft frá árinu 2009 hafa loftför verið kyrrsett, t.d. en þó ekki eingöngu vegna tímabundinnar afturköllunar eða ógildingar á lofthæfisstaðfestingarvottorði, í kjölfar 1. eða 2. stigs fráviks sem komið hefur í ljós við framkvæmd ACAM-úttektar samkvæmt grein M.B.303 í viðauka I við reglugerð (EB) nr. 2042/2003, sbr. reglugerð nr. 206/2007? Svar óskast sundurliðað eftir árlegum fjölda.
Svokallaðar ACAM-úttektir (e. Aircraft Continuing Airworthiness Monitoring) við eftirlit með lofthæfi flugvéla hófust árið 2009. Um ACAM-skoðanir, þ.e. á áframhaldandi lofthæfi, var fjallað í reglugerð (EB) nr. 2042/2003 sem innleidd var í íslenskan rétt með reglugerð nr. 206/2007. Reglugerðin var felld úr gildi með reglugerð nr. 926/2015, um viðvarandi lofthæfi loftfara og flugtæknilegra framleiðsluvara, hluta og búnaðar og um samþykki fyrir viðhaldsstöðvum og starfsfólki á þessu sviði. Með þeirri reglugerð var innleidd reglugerð framkvæmdastjórnarinnar (ESB) nr. 1321/2014 en efnisákvæði hennar um ACAM-úttektir eru þau sömu og í reglugerð (EB) nr. 2042/2003.
Í eftirfarandi töflu má sjá fjölda stöðvana frá árinu 2009. Taflan á við um kyrrsetningar í kjölfar 1. eða 2. stigs frávika sem komið hafa fram við ACAM-úttektir.
| 2009 | 2010 | 2011 | 2012 | 2013 | 2014 | 2015 | |
| Fjöldi stöðvana á ári | 2 | 3 | 6 | 5 | 0 | 3 | 2 |
Í ákvæðum fyrrnefndra reglugerða er mælt fyrir um að komi fram vísbendingar við skoðun á loftfari eða með öðrum hætti um að ekki sé farið að þeim kröfum sem gerðar eru í reglugerðinni og frávikið flokkast sem 1. stigs frávik skuli lögbært yfirvald grípa inn í, þ.e. Samgöngustofa. Hún skal krefjast þess að gripið verði til viðeigandi ráðstafana til lagfæringar á frávikinu áður en til frekara flugs kemur og afturkalla eða ógilda lofthæfistaðfestingarvottorð tímabundið tafarlaust.
Stjórnsýslulög, nr. 37/1993, kveða á um réttindi og skyldur almennings gagnvart opinberum aðilum. Nauðsyn er á skráningu gagna, m.a. gagna um stjórnvaldsákvarðanir sem teknar eru til rökstuðnings þeim og er það gert í því samhengi. Haldið er sérstaklega utan um hvert mál í eftirlitskerfi Samgöngustofu. Það býður hins vegar ekki upp á að kallaðar séu fram yfirlitsupplýsingar um aðgerðir á borð við fjölda stöðvana og ástæður þeirra.
