Ferill 697. máls. Aðrar útgáfur af skjalinu: PDF - Word Perfect.
145. löggjafarþing 2015–2016.
Þingskjal 1543 — 697. mál.
Svar
sjávarútvegs- og landbúnaðarráðherra við fyrirspurn frá Brynhildi Pétursdóttur um fundahöld.
1. Hversu margir hefðbundnir fundir voru haldnir í atvinnuvega- og nýsköpunarráðuneytinu árin 2014 og 2015 með starfsmönnum undirstofnana þess sem eru á landsbyggðinni?
Á árinu 2014 voru haldnir sex fundir með Matvælastofnun, sem hægt er að fella undir hefðbundna samráðsfundi. Á árinu 2015 voru þessir fundir tveir. Fundirnir voru oftast haldnir í ráðuneytinu eða í húsakynnum Matvælastofnunar að Stórhöfða í Reykjavík. Þess utan hafa verið haldnir fjölmargir samráðsfundir um afmarkaðri málefni með starfsmönnum Matvælastofnunar, Byggðastofnunar, starfsmönnum Ferðamálastofu á Akureyri og Nýsköpunarmiðstöðvar, sem starfa á starfsstöðvum á landsbyggðinni.
Höfuðstöðvar Fiskistofu voru fluttar frá Hafnarfirði til Akureyrar 1. janúar 2016.
2. Hversu margir fjarfundir voru haldnir í ráðuneytinu umrædd ár með starfsmönnum stofnana þess sem eru úti á landi?
Ekki liggja fyrir upplýsingar um hversu margir fjarfundir voru haldnir í ráðuneytinu umrædd ár með starfsmönnum stofnana þess sem eru úti á landi.
3. Hver var kostnaður stofnana ráðuneytisins vegna ferða starfsmanna þess til og frá Reykjavík vegna funda í ráðuneytinu árin 2014 og 2015?
Samkvæmt upplýsingum frá Byggðastofnun var kostnaður á árinu 2014 vegna ferða starfsmanna til funda í ráðuneytinu 356.812 kr., en í þeirri tölu eru dagpeningar, ferðakostnaður svo sem bílaleiga, bensín, flug (ef um það er að ræða) og gisting (ef þörf var á). Á árinu 2015 var þessi kostnaður 1.623.230 kr. Þess ber að geta að stofnunin gerir fyrirvara hér á, þó svo að byggt sé á verkbókhaldi, þar sem ekki liggur alltaf fyrir hvar fundir voru haldnir og ferðir voru gjarna samnýttar til annarra hluta. Þetta gerir það að verkum að kostnaður er talinn ofmetinn, sérstaklega á árinu 2015, þar sem í heildartölu leynist kostnaður vegna annarra erinda og á öðrum stöðum, sem var sinnt í sömu ferð.
Samkvæmt upplýsingum frá öðrum stofnunum ráðuneytisins liggur ekki fyrir sundurgreindur kostnaður vegna ferða starfsmanna á fundi í ráðuneytinu.
4. Hefur starfsfólk ráðuneytisins fengið þjálfun í notkun á fjarfundabúnaði, bæði hvað varðar tæknilegu hliðina og fundarstjórn?
Rekstrarfélag stjórnarráðsins hefur haldið stutt námskeið til kynningar á notkun fjarfundabúnaðar og eins hafa verið haldin stutt námskeið um fjarfundabúnað sem hver og einn starfsmaður getur notað í gegnum vinnutölvu. Notkun fjarfundabúnaðar hefur gengið vel. Boðið er upp á námskeið í fundarstjórn sé þess óskað.
5. Telur ráðherra að unnt sé að auka skilvirkni og afköst í starfsemi ríkisins með notkun fjarfundabúnaðar og ef svo er, hvernig? Hefur ráðuneytið mótað og kynnt stefnu í þessu sambandi?
Það er mat ráðuneytisins að skilvirkni og afköst geti aukist ef hægt er að komast hjá ferðalögum vegna funda og um leið að lækka kostnað við þá. Það fer þó eftir efni fundanna og samsetningu hvort æskilegt sé að nota fjarfundabúnað. Fyrir minni fundi sem eru haldnir einungis með starfsmönnum ráðuneytisins og stofnana þess getur fjarfundabúnaður verið hentugur. Meta verður hverju sinni hvort hentugt sé að nota fjarfundabúnað eða hefðbundið fundarform. Þá getur fjarfundabúnaður haft þann kost að aðili sem annars sæi sér ekki fært að mæta sökum fyrirhafnar, kostnaðar eða annarra ástæðna geti tekið þátt í fundinum.
Ekki hefur verið mótuð ákveðin stefna í ráðuneytinu um notkun fjarfundabúnaðar.
