Ferill 485. máls. Aðrar útgáfur af skjalinu: PDF - Word Perfect.
146. löggjafarþing 2016–2017.
Þingskjal 927 — 485. mál.
Svar
umhverfis- og auðlindaráðherra við fyrirspurn frá Orra Páli Jóhannssyni um landvörslu.
1. Hversu margar voru landvörsluvikur á árunum 2014–2016?
Árið 2014 voru landvörsluvikur alls 788, árið 2015 954,2 og árið 2015 voru þær 1.013,4. Hér er um að ræða lausráðna starfsmenn.
2. Hver var fjöldi heilsársstöðugilda við þær stofnanir hins opinbera sem sinna landvörslu á árunum 2014–2016?
Árið 2014 voru heilsársstörf alls 29 eða 1.508 vikur, árið 2015 29,5 eða 1.534 vikur og árið 2016 alls 30 eða 1.560 vikur.
3. Hefur landvarsla haldist í hendur við aukinn fjölda ferðamanna síðastliðin þrjú ár?
Umhverfis- og auðlindaráðherra telur að landvarsla sé góð og skilvirk leið til að vernda náttúru Íslands gegn álagi ferðamanna og leggur mikla áherslu á að efla landvörslu enn frekar. Það á sérstaklega við á þeim svæðum sem álag af völdum ferðamanna er hvað mest og þar sem náttúra er viðkvæm og hefur ráðherra þegar beitt sér fyrir að fá aukið fjármagn til landvörslu sem hefur skilað árangri. Ljóst er að umfang landvörslu verður að þróast í samræmi við síaukið álag af völdum ferðamanna og mun ráðherra halda áfram að beita sér fyrir að tryggja fjármagn til þessa verkefnis, til samræmis við metna þörf. Þar sem dreifing ferðamanna um landið og á einstök svæði er ekki jöfn er erfitt að fullyrða hvort landvarsla hafi haldist í hendur við aukinn fjölda ferðamanna sl. þrjú ár.
4. Hvernig er þörf á landvörslu metin hjá ráðuneytinu, stofnunum þess og sveitarfélögum?
Stofnanir ráðuneytisins meta þörf á landvörslu með því að bera saman gestafjölda síðasta árs við vænta aukningu næsta árs á hinum ýmsu svæðum. Sérstök áhersla er lögð á ástand náttúru og menningarminja, viðhald verndargildis einstakra svæða, þörf á stýringu, aðgengi, öryggi ferðamanna, upplýsingaveitu og fleiri þætti. Stefnt er að því að nýta matslista sem grundvöll fyrir mati á þörf fyrir landvörslu og forgangsröðun hennar. Unnið er að samræmdu mati á áfangastöðum innan friðlýstra svæða með það að markmiði að nýting þeirra sé innan þolmarka. Ráðuneytið hefur ekki upplýsingar um landvörslu á vegum sveitarfélaga og bendir á Samband íslenskra sveitarfélaga vegna upplýsinga þar um.
5. Hversu mikið fjármagn var lagt í landvörslu hvert ár 2014–2016, skipt eftir stofnunum, friðlýstum svæðum og meginstarfsstöðvum þjóðgarða?
Á meðfylgjandi töflu má sjá ráðstöfun fjármagns til landvörslu árin 2014–2016. Hér er um að ræða launakostnað ásamt öðrum liðum, svo sem fæðiskostnað, aksturskostnað, kostnað vegna hlífðarfatnaðar og annan starfstengdan kostnað. Hlutdeild í kostnaði við yfirstjórn og stoðþjónustu er ekki innifalin í tölunum. Bent skal á að Þingvallaþjóðgarður færðist undir umhverfis- og auðlindaráðuneyti 1. janúar 2017 en engu að síður er að finna upplýsingar um landvörslu í þjóðgarðinum á tilgreindu tímabili í svarinu.
Hér er efni sem sést aðeins í pdf-skjalinu.
