Ferill 578. máls. Aðrar útgáfur af skjalinu: PDF - Word Perfect.
150. löggjafarþing 2019–2020.
Þingskjal 1033 — 578. mál.
Svar
heilbrigðisráðherra við fyrirspurn frá Vilhjálmi Árnasyni um liðskiptaaðgerðir.
1. Hversu margir bíða þess nú að komast í liðskiptaaðgerð og hversu lengi bíður fólk að meðaltali eftir því að komast í þess konar aðgerð sé horft til sl. fjögurra ára?
Í desember 2019 1 biðu 388 eftir aðgerð á mjöðm en 795 biðu aðgerðar á hné. Í töflunni er birt meðaltal og miðgildi þeirra sem fóru í liðskiptaaðgerð á fjórum tólf mánaða tímabilum. Síðasta tímabilið skarast við það næstsíðasta.
Hér er efni sem sést aðeins í pdf-skjalinu.
2. Hvernig hafa biðlistar í liðskiptaaðgerðir þróast undanfarin fjögur ár?
Myndirnar sýna miðgildi biðtíma í vikum, en miðgildi biðtíma segir til um hvenær 50% þeirra sem fóru í aðgerð höfðu komist að.
Hér er efni sem sést aðeins í pdf-skjalinu.
Hér er efni sem sést aðeins í pdf-skjalinu.
3. Hversu margir hafa verið lagðir inn til meðferðar vegna vandamála eða frávika sem komu upp í kjölfar liðskiptaaðgerðar og hvar voru aðgerðirnar framkvæmdar?
Ekki er mögulegt að svara þessari spurningu með því að rýna tölur úr atvikaskráningu sjúkrahúsa vegna skorts á miðlægri atvikaskráningu. Ísland er ekki aðili að gæðaskrá á þessu sviði og því ekki mögulegt að meta árangur þessara aðgerða til skamms eða lengri tíma. Ekki er öruggt að vandamál sem koma upp í kjölfar liðskiptaaðgerða séu skráð sem atvik. Samkvæmt lögum um landlækni og lýðheilsu eiga veitendur heilbrigðisþjónustu að halda skrá yfir óvænt atvik og senda landlækni reglulega yfirlit þess efnis. Þær atvikaskráningar sem embættinu hafa borist eru ekki nægilega nákvæmar svo að unnt sé að flokka atvikin með þeim hætti sem dugar til að svara spurningunni. Líklegt er að einhver hluti atvika sé skráður sem þekktir fylgikvillar en ekki sem atvik.
4. Hversu margir hafa öðlast rétt til þess að fara í liðskiptaaðgerð erlendis sl. fjögur ár sökum óhóflegs biðtíma hérlendis?
Samtals hafa 104 einstaklingar fengið rétt til að fara erlendis í liðskiptaaðgerð á hné og 89 í liðskiptaaðgerð á mjöðm á árunum 2016–2019.
5. Hver hefur verið kostnaður ríkisins, bæði beinn og afleiddur, sl. fjögur ár vegna þeirra sjúklinga sem nýtt hafa rétt sinn til þess að fara í liðskiptaaðgerð erlendis á kostnað íslenska ríkisins?
Samantekt liðskiptaaðgerða sem greiddar hafa verið á grundvelli reglugerðar nr. 442/2012.
Hér er efni sem sést aðeins í pdf-skjalinu.
6. Hvaða áform hefur ráðherra um að vinna að styttingu biðtíma eftir liðskiptaaðgerðum og má vænta þess að horft verði til íslenskra einkarekinna fyrirtækja á sviði heilbrigðisþjónustu í þeim tilgangi samhliða opinberum úrræðum?
Aðgerðatíðni á Íslandi hefur vaxið töluvert undanfarin ár og nálgast þann fjölda sem gerður er í nágrannalöndum okkar. Árið 2014 voru gerðar 179 mjaðmaaðgerðir/100þús. íbúa, en eftir að biðlistaátakið hófst hefur þessum aðgerðum fjölgað í 224 mjaðmaaðgerðir/100 þús. íbúa. Þá hefur hnéaðgerðum fjölgað verulega, sbr. meðfylgjandi myndir.
Fjöldi þessara aðgerða takmarkast af þeirri fjárveitingu sem Alþingi veitir til málaflokksins. Gildir þá einu hvort um opinbera eða einkaaðila er að ræða. Hingað til hafa þær þrjár heilbrigðisstofnanir sem samið hefur verið við annað þeim fjölda aðgerða sem rúmast innan fjárveitinga Alþingis.
Í október 2019 samþykkti heilbrigðisráðherra tillögu um að gera sjúkrahúsið á Akranesi að miðstöð liðskiptaaðgerða á mjöðmum og hnjám. Tillagan felur í sér að bætt er einni skurðstofu við þær tvær sem fyrir eru á stofnuninni og gera áætlanir ráð fyrir að slík viðbót geti annað um 430 aðgerðum á ári, eða um 320 aðgerðum til viðbótar við þann fjölda aðgerða sem stofnunin gerir í dag. Viðbótarskurðstofan á Akranesi yrði einungis nýtt fyrir liðskiptaaðgerðir.
Rannsóknarverkefni er í gangi sem er samvinnuverkefni Landspítala, Heilbrigðisstofnunar Vesturlands og Heilsugæslu höfuðborgarsvæðisins sem gengur út að heilsugæslan sér um að undirbúa sjúklinga fyrir aðgerð og nýta tímann meðan beðið er eftir aðgerð til að draga úr mögulegum fylgikvillum sem gætu haft áhrif á aðgerðarferilinn og tíðni fylgikvilla í kjölfar aðgerðar. Unnið er með þætti eins og blóðskort, blóðsykurstjórnun, hreyfingu, þyngdarstjórnun, næringarráðgjöf svo og reykingaráðgjöf.
1 Nýjustu upplýsingar um stöðu á biðlistum eru úr ítarlegri innköllun um biðlista eftir liðskiptaaðgerðum sem gerð var í nóvember 2019. Tölur eru allar merktar desember 2019 til einföldunar, en þá voru gögn frá Landspítala og Sjúkrahúsinu á Akureyri tekin út. Gögn frá Heilbrigðisstofnun Vesturlands miðast við síðari hluta nóvembermánaðar og gögn frá Klíníkinni bárust ekki í ítarlegri innköllun, svo þar er miðað við gögn úr hefðbundinni biðlistainnköllun frá október 2019.
