Ferill 317. máls. Aðrar útgáfur af skjalinu: PDF - Word Perfect.
156. löggjafarþing 2025.
Þingskjal 436 — 317. mál.
Svar
innviðaráðherra við fyrirspurn frá Vilhjálmi Árnasyni um gjaldfrjáls bílastæði fyrir hreyfihamlaða.
1. Hyggst ráðherra beita sér fyrir því að hreyfihamlaðir einstaklingar geti lagt bílum sínum gjaldfrjálst í gjaldskyld bílastæði, sbr. 2. mgr. 1. gr. reglugerðar nr. 1130/2016, þar sem myndavélaeftirlit fer fram og krafa er stofnuð sjálfvirkt? Ef svo er, til hvaða aðgerða hyggst ráðherra grípa?
Um gildissvið umferðarlaga, nr. 77/2019, fer eftir 2. gr. þeirra. Samkvæmt því sem þar segir gilda ákvæði laganna meðal annars um umferð á vegum, nema annað sé ákveðið, og eftir því sem við á um umferð utan vega. Merking orðsins „vegur“ er skilgreind í 41. tölul. 1. mgr. 3. gr. og er vegur, gata, götuslóði, stígur, húsasund, brú, torg, bifreiðastæði eða þess háttar, sem notað er til almennrar umferðar. Almenn umferð er þá skv. 5. tölul. 1. mgr. 3. gr. öll meðferð ökutækja og önnur umferð samkvæmt lögunum á vegum sem eru opnir almenningi.
Í 2. mgr. 87. gr. segir að handhafa stæðiskorts fyrir hreyfihamlaða sé að nánari skilyrðum uppfylltum heimilt að leggja ökutæki í gjaldskylt bifreiðastæði án sérstakrar greiðslu. Af framangreindu þykir ljóst að ákvæðið gildir um bifreiðastæði sem notað er til almennrar umferðar, þ.e. á bifreiðastæðum sem standa almenningi opin til afnota. Að því sögðu er það skilningur ráðuneytisins að með ákvæði 2. mgr. 87. gr. hafi vilji löggjafans, samkvæmt skýru orðalagi ákvæðisins, staðið til þess að greiða götu hreyfihamlaðra og undanþiggja þá greiðsluskyldu í gjaldskyldum bifreiðastæðum sem boðin eru almenningi til afnota.
Ráðuneytið bendir því í ljósi framangreinds á að löggjafinn hefur mælt svo fyrir að hreyfihömluðum skuli, að nánari skilyrðum uppfylltum, vera heimilt að leggja ökutæki í gjaldskylt bifreiðastæði án sérstakrar greiðslu. Ráðuneytið hefur svarað erindum er varða fyrrgreinda heimild hreyfihamlaðra í samræmi við framangreint. Rekstraraðilum bifreiðastæða ber þá að starfa í samræmi við lög og með því að tryggja að handhafar stæðiskorts fyrir hreyfihamlaða geti notið lögbundinna réttinda sinna.
Að mati ráðuneytisins er, sérstaklega með tilliti til mikilvægra undirliggjandi hagsmuna, mjög óæskilegt að heimild hreyfihamlaðra til að leggja í gjaldskylt bifreiðastæði án sérstakrar greiðslu krefjist íþyngjandi aðgerða af þeirra hálfu. Kann því að vera tilefni til aðgerða í kjölfar samráðs við hagaðila.
2. Telur ráðherra að sýslumenn ættu að veita innheimtuaðilum aðgang að P-merkjaskrá til að koma í veg fyrir að hreyfihömluðum verði send krafa fyrir það að leggja í gjaldskyld bílastæði?
Að mati ráðuneytisins kann það að koma til álita, í kjölfar samráðs við hagaðila, að breytingar verði gerðar svo að sjálfvirk greiðslukerfi rekstraraðila bifreiðastæða geti sótt upplýsingar um handhafa stæðiskorts fyrir hreyfihamlaða og ökutæki þeirra úr skránni.
