Ferill 384. máls. Aðrar útgáfur af skjalinu: PDF - Word Perfect.
156. löggjafarþing 2025.
Þingskjal 712 — 384. mál.
Svar
innviðaráðherra við fyrirspurn frá Ingveldi Önnu Sigurðardóttur um fallvarnir.
1. Hve oft hefur Vegagerðin fjarlægt grjót sem féll úr fjöllum á vegi undanfarin fimm ár? Svar óskast sundurliðað eftir árum og vegum.
Tilvik þar sem fram fer hreinsun á vegi, hvort sem það er grjót eða aðrir aðskotahlutir, eru ekki formlega skráð. Staðir þar sem grjóthrun verður við veg eru því miður víða á vegakerfinu. Ef skoðuð er skráning slysa við slíkar aðstæður á landinu öllu frá aldamótum, þar sem skráð hefur verið að snjór eða grjót hafi hrunið á ökutæki, má sjá að á landsvísu hafa tilvikin verið 96 á þessu 25 ára tímabili, þar af sex tilvik með meiðslum á fólki en önnur án meiðsla.
2. Hve margar tilkynningar hefur Vegagerðin fengið um grjót sem féll á vegi undanfarin fimm ár? Svar óskast sundurliðað eftir árum og vegum.
Tilkynningar um grjót eða skriður á vegi berast á mismunandi vegu. Ef tilkynning kemur til þjónustustöðvar Vegagerðarinnar eða ef starfsmenn verða sjálfir varir við grjót á vegi eða við veg er farið strax í hreinsun en ekki er víst að slík tilfelli séu skráð í dagbók eða ástandsskráningu á vef. Það kemur því ekki endilega fram í tölfræði eða upplýsingum sem til eru í gögnum. Ráðherra hefur ákveðið að fara þess á leit við Vegagerðina að hafin verði formleg skráning á tilkynningum vegna grjóthruns á vegum.
Ef tilkynningar berast um grjót eða skriðu á vegi sem hefur áhrif á umferð er strax upplýst um það á vef auk þess sem atvikið er skráð í dagbók. Ef grjót er ekki á vegi heldur utan við veg er ekki víst að slíkt sé skráð í dagbók eða í gagnagrunn fyrir vefinn. Á síðustu árum hafa skráningar um grjót á vegi verið á bilinu 30–60 á ári.
Þeir staðir þar sem helst er talin hætta á skriðum eða grjóthruni eru skráðir á eftirfarandi kort sem sýnir einnig aðra vá á vegum.
Hér er efni sem sést aðeins í pdf-skjalinu.
Vegagerðin hefur verið í samtali við Veðurstofuna um að búa til sameiginlega skráningu um grjóthrun og skriðuföll en því ferli er ekki lokið.
3. Stendur til að koma upp fallvörnum eða grípa til annarra aðgerða vegna tíðs grjóthruns úr Holtsnúpi?
Fjármunum í svokallaðar „minni umferðaröryggisaðgerðir“ er forgangsraðað árlega. Margir vegarkaflar á landsvísu kalla á sérstakar öryggisaðgerðir og hafa aðrir kaflar raðast framar í forgangsröðun hingað til. Sem stendur eru aðgerðir við Holtsnúp ekki á áætlun.
4. Hafa áður verið gerðar áætlanir um fallvarnir við Holtsnúp?
Líkt og kom fram í svari við 3. tölul. fyrirspurnarinnar er fjármunum til „minni umferðaröryggisaðgerða“ forgangsraðað árlega en í þeirri vinnu hefur þessi tiltekni staður oft komið til álita ásamt öðrum sambærilegum stöðum. Ýmsar útfærslur eða lausnir hafa í þessu samhengi verið ræddar án þess að hægt sé að slá því föstu að til sé lausn sem eyðir alfarið hættu af völdum grjóthruns, önnur en að færa veginn. Á vegakerfinu eru margir kaflar sem kalla á sérstakar öryggisaðgerðir og við þessa vinnu hafa aðrir kaflar raðast framar í forgangsröðun fram að þessu.
5. Stendur til að hefja framkvæmdir á fallvörnum við Holtsnúp á næstu misserum?
Vísað er til upplýsinga í svari við 3. tölul. en þar segir að sem stendur séu aðgerðir við Holtsnúp ekki á áætlun.
