Ferill 589. máls. Aðrar útgáfur af skjalinu: PDF - Word Perfect.

---

157. löggjafarþing 2025–2026.
Þingskjal 1005  —  589. mál.

Tillaga til þingsályktunar

um fjölgun ferða í Loftbrú.

Flm.: Þorgrímur Sigmundsson.

    Alþingi ályktar að fela innviðaráðherra að hefja vinnu við breytingu á Loftbrú þannig að ferðum verði fjölgað úr þremur ferðum í sex ferðir til og frá Reykjavík (tólf flugleggir) á ári fyrir börn sem ferðast þurfa á milli landshluta til foreldra/forráðamanna.

Greinargerð.

    Loftbrú var komið á laggirnar í september 2020 af þáverandi samgöngu- og sveitarstjórnarráðherra. Loftbrú gefur íbúum á landsbyggðinni kost á 40% afslætti af heildarfargjaldi í innanlandsflugi og gildir fyrir alla með lögheimili fjarri höfuðborgarsvæðinu og á eyjum. Fullur afsláttur er veittur hvort sem valið er afsláttarfargjald eða fullt fargjald.
    Nú er það þannig að hver einstaklingur getur fengið lægri fargjöld fyrir allt að þrjár ferðir til og frá Reykjavík á ári (sex flugleggir) á ári. Með þingsályktunartillögu þessari er lagt til að innviðaráðherra hefji vinnu við að fjölga ferðum upp í sex ferðir til og frá Reykjavík á ári (tólf flugleggir) fyrir börn sem ferðast þurfa á milli landshluta til foreldra/forráðamanna. Með því er komið til móts við t.d. börn með lögheimili á höfuðborgarsvæðinu sem eiga foreldra eða forráðamenn búsetta á landsbyggðinni og öfugt. Í raun er þetta mikið réttlætismál þar sem flugfargjöld eru dýr og þrjár ferðir á ári eru fljótar að klárast hjá börnum sem ferðast reglulega til foreldra/forráðamanna í öðrum landshluta.