Ferill 340. máls. Aðrar útgáfur af skjalinu: PDF - Word Perfect.
149. löggjafarþing 2018–2019.
Þingskjal 649 — 340. mál.
Síðari umræða.
Nefndarálit
um tillögu til þingsályktunar um staðfestingu ákvörðunar sameiginlegu EES-nefndarinnar nr. 153/2018 um breytingu á XI. viðauka (Rafræn fjarskipti, hljóð- og myndmiðlun og upplýsingasamfélagið) við EES-samninginn.
Frá utanríkismálanefnd.
Nefndin hefur fjallað um málið og fengið á sinn fund Bergþór Magnússon og Pétur Gunnarsson frá utanríkisráðuneyti og Sigríði Rafnar Pétursdóttir frá samgöngu- og sveitarstjórnarráðuneyti.
Með tillögunni er leitað heimildar Alþingis til að staðfesta ákvörðun sameiginlegu EES-nefndarinnar nr. 153/2018, frá 6. júlí 2018, um breytingu XI. viðauka (Rafræn fjarskipti, hljóð- og myndmiðlun og upplýsingasamfélagið) við EES-samninginn frá 2. maí 1992, og fella inn í samninginn ákvörðun Evrópuþingsins og ráðsins (ESB) 2017/899 frá 17. maí 2017 um notkun tíðnisviðsins 470–790 MHz í Sambandinu.
Sex mánaða frestur samkvæmt EES-samningnum til að aflétta stjórnskipulegum fyrirvara var veittur til 6. janúar 2019. Framsetning tillögunnar telst að mati nefndarinnar í samræmi við 7. gr. reglna um þinglega meðferð EES-mála.
Aðildarríki innan EES-svæðisins skulu eigi síðar en 30. júní 2020 hafa heimilað notkun 700 MHz (694–790 MHz) tíðnisviðsins fyrir háhraðafarnetsþjónustu. Ísland er komið lengra en flestar Evrópuþjóðir í því að losa þetta tíðnisvið þannig að úthluta megi því til notkunar fyrir háhraðafarnetsþjónustu. Áður en notkun þessarar þjónustu hefst verður notendum þráðlauss búnaðar til fjölmiðlunar og á sviði annarrar miðlunar efnis tilkynnt með fyrirvara um þær áætlanir. Þessir aðilar hafa heimild til að nýta hluta tíðnisviðsins með víkjandi heimildum þar til háhraðafarnetsþjónusta hefst á umræddu tíðnisviði.
Samræmingunni er ætlað að tryggja útbreiðslu háhraðafarneta sem tryggt geti íbúum aðildarlandanna a.m.k. 30 Mb/s gagnahraða ásamt því að tryggja fríar þráðlausar sjónvarpssendingar til sömu aðila. Að auki skal þráðlausum búnaði sem notaður er til fjölmiðlunar tryggður aðgangur að tíðnisviði á næstu árum. Þá skulu stafrænar sjónvarpsútsendingar njóta forgangs á lægri hluta UHF-tíðnisviðsins (470–694 MHz) ásamt þráðlausum tækjum til fjölmiðlunar. Ákvörðunin hefur ekki áhrif á rétt aðildarríkjanna til að skipuleggja og nota tíðnisvið sín í þágu almennings, almannaöryggis og varnarmála. Þá felst engin fjárhagsleg skuldbinding hins opinbera í innleiðingu ákvörðunarinnar.
Innleiðing ákvörðunarinnar kallar á breytingar á lögum um fjarskipti, nr. 81/2003. Gert er ráð fyrir því að samgöngu- og sveitarstjórnarráðherra leggi á yfirstandandi löggjafarþingi fram frumvarp til breytinga á lögunum.
Nefndin leggur til að tillagan verði samþykkt.
Þorgerður K. Gunnarsdóttir var fjarverandi við afgreiðslu málsins en ritar undir álit þetta með heimild í 4. mgr. 18. gr. starfsreglna fyrir fastanefndir Alþingis.
Alþingi, 10. desember 2018.
| Áslaug Arna Sigurbjörnsdóttir, form. |
Ari Trausti Guðmundsson, frsm. |
Ásgerður K. Gylfadóttir. |
| Bryndís Haraldsdóttir. | Logi Einarsson. | Rósa Björk Brynjólfsdóttir. |
| Smári McCarthy. | Una María Óskarsdóttir. | Þorgerður K. Gunnarsdóttir. |
