Sumarfundur forsætisnefndar á Snæfellsnesi
Forsætisnefnd Alþingis kom saman til árlegs vinnufundar í Þjóðgarðsmiðstöðinni á Hellissandi og í Stykkishólmi dagana 2. og 3. september. Um langt árabil hefur forsætisnefnd komið saman til lengri vinnufunda áður en nýtt löggjafarþing kemur saman. Að jafnaði eru slíkir sumarfundir haldnir í kjördæmum landsins til skiptis. Rædd voru fjölmörg mál er varða starfsemi og rekstur þingsins og stofnana þess. Auk þess fékk nefndin áhugaverða kynningu á starfsemi Snæfellsjökulsþjóðgarðs frá Ragnhildi Sigurðardóttur þjóðgarðsverði.
Ásamt forsætisnefnd sat fundinn starfsfólk skrifstofu Alþingis. Einnig sátu ríkisendurskoðandi, umboðsmaður Alþingis og framkvæmdastjóri Mannréttindastofnunar Íslands þann hluta fundarins þar sem fjallað var um málefni þeirra stofnana. Var þetta í fyrsta skipti sem framkvæmdastjóri Mannréttindastofnunar Íslands situr fundinn en stofnunin tók til starfa 1. maí sl. og starfar á vegum Alþingis.
