Á forsíðu
Þingmál
Þingmenn
Þingfundir
Ræður
Lagasafn
Þingnefndir
Alþjóðastarf
Bein útsending


Næst í nærmynd
Gunnar Bragi Sveinsson
6. þm. SV, M, GBS
Gunnar Bragi Sveinsson

   
Guðrún Ögmundsdóttir

Guðrún Ögmundsdóttir

Fædd í Reykjavík 19. október 1950. Kjörforeldrar: Ögmundur Jónsson (fæddur 18. apríl 1918, dáinn 31. janúar 1971) vélstjóri og bifvélavirki, yfirverkstjóri hjá Vita- og hafnamálastofnun og kona hans Jóhanna J. Guðjónsdóttir (fædd 16. febrúar 1918, dáin 23. desember 1986). Móðir: Hulda Valdimarsdóttir (fædd 10. september 1922, dáin 13. september 1981). Maki (18. apríl 1990): Gísli Arnór Víkingsson (fæddur 5. ágúst 1956) cand. scient., sérfræðingur hjá Hafrannsóknastofnun. Foreldrar: Víkingur H. Arnórsson læknir og prófessor og kona hans Stefanía Gísladóttir. Börn: Ögmundur Viðar (1977), Ingibjörg Helga (1992).

Lauk námi í félagsfræði og félagsráðgjöf frá Roskilde Universitetscenter 1983, framhaldsnám við sama skóla í fjölmiðlafræði 1983-1985, cand. comm.-próf 1985.

Vann ýmis störf áður en nám hófst, m.a. á dagskrárdeild Ríkisútvarpsins, var sviðsmaður í Þjóðleikhúsinu, uppeldisfulltrúi við sérdeildir Hlíðaskóla og starfaði á Greiningar- og ráðgjafarstöð ríkisins. Starfsmaður SÍNE 1985-1988, verkefnisstjóri hjá LÍN, handleiðsla hjá Styrktarfélagi vangefinna, framkvæmdastjóri námskeiða fyrir aðstandendur fatlaðra barna og félagsmálafulltrúi hjá Sjálfsbjörgu. Yfirfélagsráðgjafi á kvennadeild Landspítala 1988-1994 og stundakennari við læknadeild og félagsvísindadeild HÍ. Deildarstjóri í félagsmálaráðuneytinu 1998-1999.

Í stjórn SÍNE 1985-1987, stjórn Námsmannafélagsins í Kaupmannahöfn 1981-1983, formaður Stéttarfélags íslenskra félagsráðgjafa 1988-1990, formaður Íbúasamtaka Þingholta 1988-1990. Í stjórn Alnæmissamtakanna á Íslandi 1995-1998 og stjórn Dyngjunnar 1994-1999. Í skólanefnd Kvennaskólans í Reykjavík síðan 1994. Varaborgarfulltrúi 1990-1992, borgarfulltrúi 1992-1998, í borgarráði 1992-1994, varamaður í borgarráði 1994-1998. Varaforseti borgarstjórnar 1994-1998. Varamaður í félagsmálaráði 1990-1992, í félagsmálaráði 1992-1994 og formaður þess 1994-1998. Varamaður í atvinnumálanefnd 1994-1996. Í stjórn Borgarspítalans 1990-1994. Í stjórn hjúkrunarheimilisins Eirar 1992-1994. Í stjórn SSH, Samtaka sveitarfélaga á höfuðborgarsvæðinu 1992-1994 og Þróunarfélags Reykjavíkur 1992-1994, varamaður 1994-1998. Varaformaður stjórnar Sambands íslenskra sveitarfélaga 1994-1998. Varaformaður Skipulagsnefndar Reykjavíkur 1994-1997. Í samstarfsnefnd um löggæslumál í Reykjavík 1994-1998. Í stjórn Samvistar, fjölskylduráðgjafar Reykjavíkur og Mosfellsbæjar 1994-1998. Formaður Miðgarðs, tilraunaverkefnis í Grafarvogi 1995-1998. Í nefnd um reynslusveitarfélagið Reykjavík 1995-1998. Í bygginganefnd og stjórn hjúkrunarheimilisins Skógabæjar 1995-1998. Í verkefnisstjórn Reykjavíkur vegna flutnings á málefnum fatlaðra til sveitarfélaga 1996-1998. Í stjórn Innkaupastofnunar Reykjavíkur 1996-1998. Varaformaður Byggingarnefndar Reykjavíkur 1998-1999.

Alþingismaður Reykvíkinga 1999-2003, alþingismaður Reykjavíkurkjördæmis norður 2003-2007 (Samfylkingin).

Allsherjarnefnd 1999-2007, félagsmálanefnd 1999-2003, heilbrigðis- og trygginganefnd 2003-2007.

Íslandsdeild Vestnorræna ráðsins 2003-2007.


Umsjón með jafnréttissíðu Þjóðviljans 1978-1979. Fréttaritari NT í Kaupmannahöfn 1982.

Ritstjóri: Sæmundur, blað íslenskra námsmanna erlendis (1985-1987). Í ritnefnd Veru (1986).


Síðast breytt 03.02.2015.





Þingmenn í stafrófsröð

Skammstafanir í æviágripum



Öllum fyrirspurnum, ábendingum og tillögum um
vef Alþingis skal beint til ritstjóra vefs Alþingis.